കേരളത്തിന്റെ മുഖ്യമന്ത്രിയെ നിശ്ചയിക്കുന്നതിനുള്ള കോൺഗ്രസ് ഹൈക്കമാൻഡിന്റെ നിർണ്ണായക ചർച്ചകൾ അന്തിമഘട്ടത്തിലേക്ക്. ഏറെ നീണ്ടുപോയ അനിശ്ചിതത്വങ്ങൾക്ക് വിരാമമിട്ടുകൊണ്ട് ഇന്ന് തന്നെ പ്രഖ്യാപനം ഉണ്ടായേക്കുമെന്നാണ് ഡൽഹിയിൽ നിന്നുള്ള സൂചനകൾ. രാഹുൽ ഗാന്ധി കഴിഞ്ഞ ദിവസം കേരളത്തിലെ മുതിർന്ന നേതാക്കളുമായും കെ.പി.സി.സി ഭാരവാഹികളുമായും സംസാരിച്ചിരുന്നു.
എ.ഐ.സി.സി അധ്യക്ഷൻ മല്ലികാർജുൻ ഖർഗെ ബംഗളൂരുവിൽ നിന്ന് ഡൽഹിയിൽ തിരിച്ചെത്തിയിട്ടുണ്ട്. ഖർഗെയും രാഹുലും തമ്മിലുള്ള കൂടിക്കാഴ്ചയ്ക്ക് ശേഷം സോണിയാ ഗാന്ധിയുമായി സംസാരിച്ച് അന്തിമ തീരുമാനം കൈക്കൊള്ളും. പ്രഖ്യാപനം വൈകരുതെന്ന അഭിപ്രായമാണ് നേതാക്കൾ കൂടിക്കാഴ്ചയിൽ ആവശ്യപ്പെട്ടത്.
ഭരണനേതൃത്വത്തെ നിശ്ചയിക്കുന്നതിൽ ഇത്രയധികം കാലതാമസം നേരിടുന്നത് മുന്നണി പ്രവർത്തകർക്കിടയിലും പൊതുജനങ്ങൾക്കിടയിലും വലിയ നിരാശയ്ക്ക് കാരണമായിട്ടുണ്ട്.
എന്നാൽ, ഭൂരിപക്ഷത്തിൽ വിശ്വാസമർപ്പിക്കുകയാണ് കെ സി വേണുഗോപാൽ. സമവായത്തിലാണ് രമേശ് ചെന്നിത്തലയുടെ പ്രതീക്ഷ. സമ്മർദ്ദം വിജയിക്കുമെന്ന പ്രതീക്ഷയിലാണ് വി ഡി സതീശൻ.
ഇതിനിടെ മുഖ്യമന്ത്രി പ്രഖ്യാപനത്തിലെ ലാഗിനെതിരെ ലീഗും രംഗത്തെത്തി. തീരുമാനം വൈകുന്നതിൽ മുസ്ലിം ലീഗിൽ പ്രതിഷേധം കനക്കുകയാണ്. ഇടഞ്ഞു നിൽക്കുന്ന ലീഗിനെ അനുനയിപ്പിക്കാനുള്ള ശ്രമത്തിലാണ് നേതാക്കൾ. ചർച്ചയ്ക്കായി ദീപാ ദാസ് മുൻഷി ലീഗ് നേതാക്കളെ വിളിപ്പിച്ചിട്ടുണ്ട്.
