തിരുവനന്തപുരം: മാസപ്പടി കേസിൽ ഇ.ഡിയുടെ കത്തിന്റെ അടിസ്ഥാനത്തിൽ അന്വേഷണത്തിനൊരുങ്ങുന്ന സർക്കാർ തീരുമാനത്തിൽ പ്രതികരണവുമായി പി.എ. മുഹമ്മദ് റിയാസ് രംഗത്ത്. അന്വേഷണത്തെക്കുറിച്ച് ടി.വിയിലൂടെയാണ് അറിഞ്ഞതെന്നും, ഒരു തരത്തിലുള്ള തെറ്റും ചെയ്തിട്ടില്ലാത്തതിനാൽ പൂർണ്ണ ആത്മവിശ്വാസത്തോടെ മുന്നോട്ടുപോകുമെന്നും അദ്ദേഹം മാധ്യമങ്ങളോട് വ്യക്തമാക്കി.
ഇ.ഡി അന്വേഷണങ്ങളെയും നടപടികളെയും കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ മുൻകാലങ്ങളിൽ ശക്തമായി എതിർത്തിട്ടുള്ളതാണെന്ന് റിയാസ് ചൂണ്ടിക്കാട്ടി. എന്നാൽ കോൺഗ്രസ് നയിക്കുന്ന സംസ്ഥാന സർക്കാർ ഇ.ഡി. റിപ്പോർട്ട് വിശ്വാസത്തിലെടുത്ത് അന്വേഷണത്തിന് തീരുമാനമെടുത്തത് സമൂഹം ചർച്ച ചെയ്യുമെന്നും അദ്ദേഹം പറഞ്ഞു.
രാഷ്ട്രീയപരമായ കാര്യങ്ങൾ പാർട്ടി സെക്രട്ടറി വ്യക്തമാക്കുമെന്നും റിയാസ് കൂട്ടിച്ചേർത്തു.
