തിരുവനന്തപുരം: ചിറയിൻകീഴ് എംഎൽഎ രമ്യ ഹരിദാസിന്റെ പേഴ്സണൽ അസിസ്റ്റന്റ് വി. വിമൽ രാജിവെച്ചു. വ്യക്തിപരമായ കാരണങ്ങൾ ചൂണ്ടിക്കാട്ടിയാണ് എംഎൽഎയ്ക്ക് രാജിക്കത്ത് നൽകിയത്. രാജിക്കത്ത് ഇന്ന് (ഒക്ടോബർ 15) നിയമസഭാ സെക്രട്ടേറിയറ്റിന് കൈമാറും.
ജോലിഭാരം മൂലമാണ് രാജി എന്നാണ് രമ്യ ഹരിദാസിന്റെ വിശദീകരണമെങ്കിലും, ചിറയിൻകീഴിൽ അടുത്തിടെയുണ്ടായ പാർട്ടി കയ്യാങ്കളി വിവാദത്തിന്റെ പശ്ചാത്തലത്തിലാണ് ഈ രാജിയെന്നാണ് സൂചന. രാജി സംബന്ധിച്ച കാര്യങ്ങൾ പാർട്ടിയെ ധരിപ്പിക്കുമെന്ന് കോൺഗ്രസ് അനുകൂല സർവീസ് സംഘടനാ നേതാവ് കൂടിയായ വിമൽ വ്യക്തമാക്കി. തദ്ദേശ വകുപ്പിൽ നിന്ന് ഡെപ്യൂട്ടേഷനിലാണ് അദ്ദേഹം പിഎയായി എത്തിയത്.
സെപ്റ്റംബർ നാലിന് ചിറയിൻകീഴിൽ രമ്യ ഹരിദാസ് എംഎൽഎയും പ്രാദേശിക കോൺഗ്രസ് നേതാക്കളും തമ്മിൽ വാക്കുതർക്കവും കയ്യാങ്കളിയും ഉണ്ടായിരുന്നു. വിഷയത്തിൽ എംഎൽഎയ്ക്ക് ഗുരുതര വീഴ്ച സംഭവിച്ചെന്നും പക്വതയോടെ ഇടപെട്ടില്ലെന്നും അന്വേഷണ സമിതി കണ്ടെത്തിയിരുന്നു. തനിക്കെതിരെ അപവാദ പ്രചാരണമുണ്ടായപ്പോൾ കെപിസിസിയെ സമീപിക്കുന്നതിന് പകരം അനാവശ്യ വിവാദമുണ്ടാക്കിയെന്ന റിപ്പോർട്ടിന്റെ അടിസ്ഥാനത്തിൽ കെപിസിസി അധ്യക്ഷൻ രമ്യ ഹരിദാസിന് താക്കീത് നൽകിയിരുന്നു.
