എന് ഡി എയുടെ രാഷ്ട്രപതി സ്ഥാനാര്ഥി ദ്രൗപദി മുര്മു ഇന്ന് നാമനിര്ദേശ പത്രിക സമര്പ്പിക്കും. പ്രധാനമന്ത്രി നരേന്ദ്രമോദി ഉള്പ്പെടെയുള്ള നേതാക്കള് ദ്രൗപദി മുര്മുവിനെ അനുഗമിക്കും. സഖ്യകക്ഷി നേതാക്കള്ക്കൊപ്പം ബിജു ജനതാദള്, വൈഎസ്ആര്സിപി തുടങ്ങിയ പാര്ട്ടികളില് നിന്നുളള പ്രതിനിധികളും പങ്കെടുക്കും.
ഒഡിഷയില്നിന്ന് വ്യാഴാഴ്ച ഡല്ഹിയില് എത്തിയ മുര്മു പ്രധാനമന്ത്രി നരേന്ദ്ര മോദി, ഉപരാഷ്ട്രപതി വെങ്കയ്യ നായിഡു, ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്നാഥ് സിങ്, ബിജെപി അധ്യക്ഷന് ജെ പി നദ്ദ എന്നിവരുമായി കൂടിക്കാഴ്ച നടത്തി. നാല് സെറ്റ് പത്രിക സമര്പ്പിക്കാനാണ് എന്ഡിഎ തെരഞ്ഞെടുപ്പ് സമിതിയുടെ തീരുമാനം. ജൂണ് 25 മുതല് പ്രചരണം ആരംഭിക്കും. നിതീഷ് കുമാറിന്റെ ജെഡിയുവും ഒഡീഷ മുഖ്യമന്ത്രി നവീന് പട്നായികും കൂടി പിന്തുണ അറിയിച്ചതോടെ അനായാസ വിജയം ഉറപ്പാക്കിയിരിക്കുകയാണ് എന്ഡിഎയുടെ രാഷ്ട്രപതി സ്ഥാനാര്ത്ഥി ദ്രൗപദി മുര്മു.
മുര്മുവിന്റെ സ്ഥാനാര്ഥിത്വം സമൂഹത്തിലെ എല്ലാ വിഭാഗവും രാജ്യവ്യാപകമായി അംഗീകരിച്ചെന്ന് പ്രധാനമന്ത്രി മോദി പറഞ്ഞു. അടിസ്ഥാനവര്ഗ്ഗത്തിന്റെ പ്രശ്നങ്ങളെ കുറിച്ചും, രാജ്യത്തിന്റെ വികസനത്തിനെ കുറിച്ചും കൃത്യമായ കാഴ്ച്ചപ്പാടുള്ള നേതാവാണ് മുര്മ്മുവെന്നാണ് കൂടിക്കാഴ്ചയ്ക്ക് ശേഷം പ്രധാനമന്ത്രി നരേന്ദ്രമോദി ട്വിറ്ററില് കുറിച്ചത്.
