മുഖ്യമന്ത്രി പിണറായി വിജയനെതിരെ അവകാശലംഘനത്തിന് നോട്ടീസ് നല്കി പ്രതിപക്ഷം. സഭയെ തെറ്റിദ്ധരിപ്പിച്ചെന്ന് ചൂണ്ടിക്കാട്ടി മാത്യു കുഴല്നാടനാണ് സ്പീക്കര് എംബി രാജേഷിന് നോട്ടീസ് നല്കിയത്. മുഖ്യമന്ത്രിയുടെ മകള് വീണയ്ക്കെതിരേ മാത്യു കുഴല്നാടന് എംഎല്എ ആരോപണങ്ങള് ഉന്നയിച്ചിരുന്നു. വീണ വിജയന്റെ ഉടമസ്ഥതയിലുള്ള എക്സലോജിക് സൊലൂഷന്സ് കമ്പനിയുടെ വെബ്സൈറ്റില് പ്രൈസ് വാട്ടര് ഹൗസ് കൂപ്പേര്സ് സ്ഥാപനത്തിന്റെ ഡയറക്ടര് ജെയ്ക് ബാലകുമാര് കമ്പനിയുടെ മെന്റര് ആണെന്ന് വ്യക്തമാക്കിയിരുന്നത് മാത്യു കുഴല്നാടന് സഭയുടെ ശ്രദ്ധയില് കൊണ്ടുവന്നിരുന്നു. ഈ ഭാഗം പിന്നീട് കമ്പനിയുടെ വെബ്സൈറ്റില്നിന്ന് നീക്കംചെയ്തെന്നും അദ്ദേഹം ആരോപിച്ചിരുന്നു.മുഖ്യമന്ത്രി സഭയെ തെറ്റിദ്ധരിപ്പിച്ചതാണ്. അതുകൊണ്ട് മുഖ്യമന്ത്രിക്കെതിരെ അവകാശലംഘനത്തിന് നടപടിയെടുക്കണമെന്നാണ് പ്രതിപക്ഷത്തിന്റെ ആവശ്യം.
