കോഴിക്കോടിൽ നിപ പശ്ചാത്തലത്തില് കണ്ടെയിന്മെന്റ് സോണില് ഉള്പ്പെട്ട മുഴുവന് സ്കൂളുകളിലെയും വിദ്യാര്ഥികള്ക്ക് വീട്ടിലിരുന്ന് അറ്റന്ഡ് ചെയ്യാവുന്ന തരത്തില് ഓണ്ലൈന് ക്ലാസുകള് സംഘടിപ്പിക്കാന് വിദ്യാഭ്യാസ മന്ത്രി വി. ശിവന്കുട്ടി. പൊതുവിദ്യാഭ്യാസ ഡയറക്ടര് ഷാനവാസ് എസിന് ഇതുമായി ബന്ധപ്പെട്ട നിര്ദേശം മന്ത്രി നല്കി. സാക്ഷരതാ മിഷന്റെ പത്താംതരം തുല്യതാ പരീക്ഷ നടന്നുകൊണ്ടിരിക്കുകയാണ്. അതിനാൽ കണ്ടെയിന്മെന്റ് സോണില് ഉള്പ്പെട്ടവരുടെ പരീക്ഷകള് പിന്നീട് നടത്തുന്നതാണ്. മറ്റ് കേന്ദ്രങ്ങളിലെ പരീക്ഷകള്ക്ക് മാറ്റമുണ്ടാവില്ലെന്നും മന്ത്രി അറിയിച്ചു. നിപ വൈറസ് ബാധ റിപ്പോര്ട്ട് ചെയ്ത സാഹചര്യത്തില് ഏഴു ഗ്രാമപഞ്ചായത്തുകളിലെ വാര്ഡുകളാണ് കണ്ടെയിന്മെന്റ് സോണായി പ്രഖ്യാപിച്ചത്. ആയഞ്ചേരി ഗ്രാമപഞ്ചായത്ത് – 1,2,3,4,5,12,13,14,15 വാര്ഡുകള്, മരുതോങ്കര ഗ്രാമപഞ്ചായത്ത് – 1,2,3,4,5,12,13,14 വാര്ഡുകള്, തിരുവള്ളൂര് ഗ്രാമപഞ്ചായത്ത് – 1,2,20 വാര്ഡുകള്, കുറ്റ്യാടി ഗ്രാമപഞ്ചായത്ത് – 3,4,5,6,7,8,9,10 വാര്ഡുകള്, കായക്കൊടി ഗ്രാമപഞ്ചായത്ത് – 5,6,7,8,9 വാര്ഡുകള്, വില്യപ്പളളി ഗ്രാമപഞ്ചായത്ത് – 6,7 വാര്ഡുകള്, കാവിലും പാറ ഗ്രാമപഞ്ചായത്ത് – 2,10,11,12,13,14,15,16 വാര്ഡുകള്. കണ്ടെയിന്മെന്റ് സോണായ ഈ പ്രദേശങ്ങളില് നിന്ന് അകത്തേക്കോ പുറത്തേക്കോ യാത്ര ചെയ്യാന് അനുവദിക്കുകയില്ലെന്നും കലക്ടര് അറിയിച്ചു. ഈ പ്രദേശങ്ങളിലുള്ളവര് സാമൂഹിക അകലം പാലിക്കണം. മാസ്ക്, സാനിറ്റൈസര് എന്നിവ നിര്ബന്ധമായും ഉപയോഗിക്കണമെന്നും കലക്ടര് ആവശ്യപ്പെട്ടു.
