കുന്ദമംഗലം: വഴിയരികിൽ നിന്ന് കളഞ്ഞു കിട്ടിയ സ്വർണാഭരണം ഉടമയെ കണ്ടുപിടിച്ച് തിരിച്ച് നൽകി അഭിഭാഷക മാതൃകയായി. കഴിഞ്ഞ ശനിയാഴ്ച മുണ്ടിക്കൽതാഴം ബസാറിൽ നിന്നാണ് കുന്ദമംഗംലം ബാറിലെ അഭിഭാഷകയായ നജ്ലയ്ക്ക് 750000രൂപ വിലമതിക്കുന്ന സ്വർണാഭരണം കളഞ്ഞുകിട്ടിയത്. തുടർന്ന് ഓട്ടോ ഡ്രൈവറായ ഉസ്മാന്റെ സഹായത്തോടെ പ്രദേശത്തെ ഓട്ടോ തൊഴിലാളികളുടേയും മഹല്ലിന്റേയും വാട്സാപ്പ് ഗ്രൂപ്പുകളിൽ കളഞ്ഞ് കിട്ടിയ ആഭരണത്തെ കുറിച്ചുള്ള വിവരം പ്രചരിപ്പിച്ചിരുന്നു. ഇതോടെ ആഭരണം കളഞ്ഞുപോയതിൽ വിഷമിച്ചു കഴിയുകയായിരുന്ന ആളിലേക്കും ഈ സന്ദേശം എത്തി. ഉടമയെ കണ്ടെത്തിയതോടെ ഇവർ കുന്ദമംഗലം പോലീസ് സ്റ്റേഷനിൽ എത്തി. സ്റ്റേഷനിൽ വെച്ച് സബ് ഇൻസ്പെക്ടറുടെ സാന്നിധ്യത്തിലാണ് നജ്ലയും ഉസ്മാനും ചേർന്ന് ആഭരണം ഉടമയ്ക്ക് കൈമാറിയത്. മറ്റുള്ളവരെ സഹായിക്കാൻ മടിക്കുന്ന ഈ കാലത്ത് നജ്ലയുടെ ഈ പ്രവർത്തി തീർത്തും അഭിനന്ദനങ്ങൾ അർഹിക്കുന്ന ഒന്നാണ്. വിലമതിക്കുന്ന ഇത്തരം സാധനങ്ങൾ കളഞ്ഞു പോയവരിലേക്ക് തിരികെ എത്തിച്ച് മാതൃകയാവൻ നമ്മൾ ഓരോരുത്തരും ശ്രമിക്കേണ്ടതാണ്.
