ആര്എസ്എസ് മുഖപത്രത്തില് കത്തോലിക്കാ സഭയ്ക്ക് എതിരെ പ്രസിദ്ധീകരിച്ച ലേഖനം ആയുധമാക്കി പ്രതിപക്ഷം. ആര്എസ്എസ് ക്രിസ്ത്യാനികള്ക്കെതിരെ തിരിയാന് അധികം സമയം വേണ്ടിവന്നില്ലെന്നായിരുന്നു രാഹുല് ഗാന്ധിയുടെ പ്രതികരണം. വഖഫ് ബില് പാസാക്കിയ ബി.ജെ.പിയുടെ അടുത്തലക്ഷ്യം കത്തോലിക്കാ സഭയാണ്. ഭരണഘടനയാണ് ആശ്രയമെന്നും, അത് സംരക്ഷിക്കാന് മുന്നിട്ടിറങ്ങണമെന്നും രാഹുല് ഗാന്ധി എക്സില് കുറിച്ചു.
ആര്എസ്എസ് മുഖപത്രമായ ഓര്ഗനൈസറില് കഴിഞ്ഞ വ്യാഴാഴ്ചയാണ് കത്തോലിക്ക സഭയുടെ സ്വത്ത് വിവരങ്ങളെക്കുറിച്ചുള്ള ലേഖനം പ്രസിദ്ധീകരിച്ചത്. വഖഫ് ബോര്ഡിനേക്കാള് ഭൂമി കത്തോലിക്ക സഭയുടെ കയ്യിലുണ്ട്. 20000 കോടി വിലമതിക്കുന്ന 7 കോടി ഹെക്ടര് ഭൂമി സഭയുടെ പക്കലുണ്ട്. 2457 ആശുപത്രികള്, 240 മെഡിക്കല്-നഴ്സിങ് കോളജുകള്, പിതി മൂവായിരത്തോളം വിദ്യാഭ്യസ സ്ഥാപനങ്ങളും സഭയ്ക്കുണ്ട്. 1927ല് ബ്രിട്ടണ് നടപ്പാക്കിയ ഇന്ത്യന് ചര്ച്ച് ആക്ട് സഭയ്ക്ക് വലിയ തോതിലുള്ള ഭൂമി സ്വന്തമാക്കാന് അവസരം ഒരുക്കിയെന്നും ലേഖനം പറയുന്നു.
കണക്കുകള് ഓര്മ്മപ്പെടുത്തുന്നതിന് ഒപ്പം കത്തോലിക്ക സഭ ഭൂമി സ്വന്തമാക്കിയത് നിയമാനുസൃതമായ മാര്ഗങ്ങളിലൂടെ തന്നെയാണോ എന്ന സംശയവും ഓര്ഗനൈസര് ഉന്നയിക്കുന്നു. രാജ്യവ്യാപക ചര്ച്ചയായതോടെ ലേഖനം ഓര്ഗനൈസര് പിന്വലിച്ചു. ഓര്ഗനൈസര് ലേഖനത്തിനെതിരെ രൂക്ഷവിമര്ശനവുമായി പ്രതിപക്ഷ നേതാവ് വിഡി സതീശനടക്കമുള്ള നേതാക്കള് രംഗത്ത് വന്നു.
