ഒളിമ്പിക്സ് ഹോക്കിയില് ജര്മനിക്കെതിയെ വീഴത്തി ഇന്ത്യക്ക് വെങ്കല മെഡല്. വെങ്കലപ്പോരാട്ടത്തില് ജര്മനിക്കെതിരെ 5-4 ന് മത്സരം വിജയിച്ചാണ് ഇന്ത്യയുടെ നേട്ടം. ഇന്ത്യയ്ക്ക് വേണ്ടി സിമ്രന്ജിത് സിംഗ്, ഹാര്ദിക് സിംഗ്, ഹര്മന്പ്രീത് എന്നിവരാണ് ഗോളുകള് നേടിയത്. മലയാളി ഗോള് കീപ്പര് പി.ആര് ശ്രീജേഷിന്റെ പ്രകടനവും മത്സരത്തില് നിര്ണായകമായി. നാലു പതിറ്റാണ്ടിന്റെ ചരിത്രം തിരുത്തിയാണ് ടോക്യോ ഒളിംമ്പിക്സില് പുരുഷ ഹോക്കിയില് ഇന്ത്യ വെങ്കലം നേടിയത്. ഒരുവേളം ഒന്നിനെതിരേ മൂന്ന് ഗോളിന് പിന്നിട്ടുനിന്നശേഷമാണ് ഇന്ത്യ മൂന്ന് ഗോള് തിരിച്ചടിച്ച് തിരിച്ചുവന്നത്.അവസാന സെക്കന്ഡില് ജര്മനിക്ക് ഒരു പെനാല്റ്റി കോര്ണര് ലഭിച്ചെങ്കിലും ഇന്ത്യന് കീപ്പര് പി. ആര്. ശ്രീജേഷ് അത് അത്ഭുതകരമായി തടഞ്ഞിട്ടത് മത്സരത്തില് ഇന്ത്യക്ക് നിര്ണായകമായി.
മത്സരത്തില് ആദ്യ ക്വാര്ട്ടറില് തിമൂറിലൂടെ ജര്മനി ലീഡെടുത്തിരുന്നു. എന്നാല് രണ്ടാം ക്വാര്ട്ടറിന്റെ തുടക്കത്തില് സിമ്രന്ജീത് ഇന്ത്യയെ ഒപ്പമെത്തിച്ചു. വൈകാതെ വില്ലെന് ജര്മനിക്ക് വീണ്ടും മുന്തൂക്കം നല്കി. പിന്നാലെ ഫര്ക്കിലൂടെ ജര്മനി 3-1ന്റെ വ്യക്തമായ ആധിപത്യം നേടുകയും ചെയ്തു. എന്നാല് ഇതിന് ശേഷം ഇരട്ട ഗോളുമായി തിരിച്ചെത്തുന്ന ഇന്ത്യയെയാണ് ടോക്കിയോയില് കണ്ടത്.
റീബൗണ്ടില് നിന്ന് ഹര്ദിക് മത്സരത്തില് ഇന്ത്യയുടെ രണ്ടാം ഗോള് നേടിയപ്പോള് ഹര്മന്പ്രീതാണ് മൂന്നാം ഗോളുമായി ഇന്ത്യയെ ഒപ്പമെത്തിച്ചു. ഇതോടെ സ്കോര് 3-3. ടൂര്ണമെന്റില് ഹര്മന്പ്രീതിന്റെ ആറാം ഗോള് കൂടിയാണിത്. മൂന്നാം ക്വാര്ട്ടറിലും ഇന്ത്യ അതിശക്തമായ തിരിച്ചുവരവ് തുടര്ന്നതോടെ ഗോള്മഴയായി. രൂപീന്ദറും സിമ്രന്ജിതും ലക്ഷ്യം കണ്ടപ്പോള് ഇന്ത്യ 5-3ന്റെ ലീഡ് കയ്യടക്കി. അവസാന ക്വാര്ട്ടറില് തുടക്കത്തിലെ ഗോള് മടക്കി ജര്മനി ഒരുവേള ഇന്ത്യയെ പ്രതിരോധത്തിലാക്കി. എന്നാല് ശ്രീജേഷ് അത് അത്ഭുതകരമായി തടഞ്ഞിട്ടത് മത്സരത്തില് ഇന്ത്യക്ക് നിര്ണായകമായി.
1980 മോസ്ക്കോ ഒളിമ്പിക്സില് സ്വര്ണം നേടിയശേഷം ഇതാദ്യമായാണ് ഇന്ത്യ ഒളിമ്പിക്സില് ഒരു മെഡല് നേടുന്നത്. ഒളിമ്പിക്സിന്റെ ചരിത്രത്തിലെ ഇന്ത്യയുടെ മൂന്നാം വെങ്കലമാണിത്. ഇതുവരെയായി എട്ട് സ്വര്ണവും ഒരു വെള്ളിയും മൂന്ന് വെങ്കലവുമാണ് ഇന്ത്യയുടെ സമ്പാദ്യം.
