തൃശ്ശൂര്: വടക്കാഞ്ചേരി കുണ്ടന്നൂരില് പൊലീസിന്റെ വന് കഞ്ചാവ് വേട്ട. പിക്കപ്പ് വാനില് കടത്തുകയായിരുന്ന 80 കിലോയോളം കഞ്ചാവാണ് പിടികൂടിയത്. സംഭവത്തില് തമിഴ്നാട് സ്വദേശികളായ മൂന്നുപേര് പിടിയിലായി. ധര്മ്മപുരി സ്വദേശികളായ പൂവരശ്, മണി, ദിവിത്ത് എന്നിവരാണ് പിടിയിലായത്. ഇന്ന് പുലര്ച്ചെ ഒരു മണിയോടെയായിരുന്നു കഞ്ചാവ് പിടികൂടിയത്. വടക്കാഞ്ചേരി പോലീസും സിറ്റി ഡാന്സാഫ് ടീമും നടത്തിയ വാഹന പരിശോധനയിലാണ് പ്രതികള് പിടിയിലായത്.
രഹസ്യ വിവരത്തെ തുടര്ന്നായിരുന്നു പരിശോധന. വടക്കാഞ്ചേരി, എരുമപ്പെട്ടി, കുന്നംകുളം മേഖലകളില് വിതരണത്തിനായി കൊണ്ടുവന്ന കഞ്ചാവാണ് പിടികൂടിയത്. കഞ്ചാവ് ഓര്ഡര് നല്കി എത്തിച്ച ആളുകള്ക്കായി പോലീസ് അന്വേഷണം ആരംഭിച്ചു.
വടക്കാഞ്ചേരി സി ഐ റിജിന് എം തോമസ്, ഗുരുവായൂര് സിഐ പ്രേമാനന്ദകൃഷ്ണന്, എസ്ഐ മാരായ അനുരാജ് പ്രദീപ്, എ എസ് ഐ ജിജേഷ്, എസ്സിപിഒ അരുണ്, ബാബു, ഹോം ഗാര്ഡ് ഓമനക്കുട്ടന്, സിറ്റി ഡാന്സാഫ് ടീം എന്നിവര് സംയുക്തമായാണ് കഞ്ചാവ് പിടികൂടിയത്.
