കണ്ണൂര്: പാനൂര് സ്ഫോടനത്തിന്റെ മുഖ്യസൂത്രധാരന് ഡി.വൈ.എഫ്.ഐ യൂണിറ്റ് സെക്രട്ടറിയെന്ന് പൊലീസ്. മുഖ്യസൂത്രധാരനായ കുന്നോത്ത് പറമ്പ് യൂണിറ്റ് സെക്രട്ടറി ഷിജാലിന് വേണ്ടി തിരച്ചില് ഊര്ജിതമാക്കിയിട്ടുണ്ട്. അറസ്റ്റിലായ അമല് ബാബുവിനും ഡി.വൈ.എഫ്.ഐ ഭാരവാഹിയാണ്. അതേസമയം പരിക്കേറ്റ് ചികിത്സയില് കഴിയുന്ന അശ്വന്ത്, വിനോദ് എന്നിവരുടെ അറസ്റ്റ് ഇന്ന് രേഖപ്പെടുത്തും.
കഴിഞ്ഞ വ്യാഴാഴ്ച രാത്രി ഒരുമണിയോടെയാണ് സ്ഫോടനം ഉണ്ടായത്. ബോംബ് നിര്മാണത്തിനിടെയാണ് സ്ഫോടനം നടന്നതെന്നാണ് പൊലീസ് എഫ്.ഐ.ആറില് പറയുന്നത്. പരിക്കേറ്റ് ചികിത്സയില് കഴിയുന്നവര്ക്കെതിരെ പൊലീസ് കേസെടുത്തിരുന്നു. ഗുരുതരമായി പരിക്കേറ്റ പാനൂര് മുളിയത്തോട് സ്വദേശി ഷെറിന് കാട്ടിന്റവിട കോഴിക്കോട് മെഡിക്കല് കോളേജില് ചികിത്സയിലിരിക്കെ മരിച്ചിരുന്നു. കൈപ്പത്തി തകര്ന്ന വിനീഷ് വലിയ പറമ്പത്ത് ആശുപത്രിയില് ചികിത്സയിലാണ്.