കണ്ണൂര്‍: കണ്ണൂര്‍ കൂത്തുപറമ്പില്‍ ഭിന്നശേഷിക്കാരന്റെ തട്ടുകട അടിച്ചു തകര്‍ത്തു. കിണവക്കല്‍ മാവ്വേരി സ്വദേശി അബ്ദുള്‍ റഷീദിന്റെ ഉടമസ്ഥതയിലുള്ള കടയാണ് അടിച്ചു തകര്‍ത്തത്. നാളെ ഉദ്ഘാടനം ചെയ്യാനിരിക്കെയായിരുന്നു അക്രമം.
ഇരു കാലിനും സ്വാധീനമില്ലാത്ത റഷീദിന് സുഹൃത്തുക്കള്‍ ചേര്‍ന്ന് പണം സ്വരൂപിച്ചാണ് തട്ടുകട നിര്‍മിച്ചു നല്‍കിയത്. തുടര്‍ന്നാണ് കണ്ണൂര്‍ – കൂത്തുപറമ്പ് റോഡില്‍ പാരിസ് കഫെ എന്ന പേരില്‍ റഷീദ് തട്ടുകട ആരംഭിക്കുന്നത്.
ഇന്ന് പുലര്‍ച്ചെ മുഖം മൂടി ധരിച്ചെത്തിയ ഒരാള്‍ കട അടിച്ച് തകര്‍ക്കുകയും കടയുടെ മേല്‍ക്കൂര വലിച്ച് താഴേക്കിടുകയുമായിരുന്നു. റഷിദിന്റെ പരാതിയുടെ അടിസ്ഥാനത്തില്‍ കൂത്തുപറമ്പ് പൊലീസ് അന്വേഷണം ആരംഭിച്ചു.
