ജമ്മു കശ്മീരിലും ശ്രദ്ധ വാക്കർ മോഡൽ കൊലപാതകം. ബുദ്ഗാമിൽ 30 കാരിയെ കൊലപ്പെടുത്തി മൃതദേഹം കഷണങ്ങളാക്കി വിവിധ സ്ഥലങ്ങളിൽ കുഴിച്ചുമൂടി. യുവതിയെ കാണാനില്ലെന്ന് സഹോദരൻ നൽകിയ പരാതിയിൽ നടത്തിയ അന്വേഷണത്തിലാണ് കേസ് തെളിഞ്ഞത്. പ്രതി ഷബീർ അഹമ്മദ് വാനിയെ അറസ്റ്റ് ചെയ്തിട്ടുണ്ടെന്നും ഇയാൾ കുറ്റം സമ്മതിച്ചതായും പോലീസ് അറിയിച്ചു.
മാർച്ച് ഏഴിന് കോച്ചിംഗ് ക്ലാസിന് പോയ 30 കാരി വീട്ടിൽ തിരിച്ചെത്തിയിരുന്നില്ല ഇതിനെ തുടർന്ന് തൊട്ടടുത്ത ദിവസം യുവതിയുടെ സഹോദരൻ തൻ്റെ സഹോദരിയെ കാണാനില്ലെന്ന വിവരം പോലീസിനെ അറിയിച്ചു. രേഖാമൂലം പരാതി നൽകുകയും പരാതിയുടെ അടിസ്ഥാനത്തിൽ പോലീസ് കേസെടുത്ത് അന്വേഷണം ആരംഭിച്ചു.തുടർന്ന് മരപ്പണിക്കാരൻ ഷബീർ അഹമ്മദ് വാനി ഉൾപ്പെടെ നിരവധി പ്രതികളെ പോലീസ് കസ്റ്റഡിയിലെടുത്തു.
ചോദ്യം ചെയ്യലിൽ 45 കാരനായ ഷബീർ അഹമ്മദ് യുവതിയെ കൊലപ്പെടുത്തി മൃതദേഹം പല കഷണങ്ങളാക്കി മുറിച്ചശേഷം വിവിധ സ്ഥലങ്ങളിൽ കുഴിച്ചിട്ടതായി സമ്മതിച്ചു. പ്രതിയുടെ മൊഴിയുടെ അടിസ്ഥാനത്തിൽ യുവതിയുടെ ശരീരഭാഗങ്ങൾ പോലീസ് കണ്ടെടുത്തു.
