കൊച്ചി: എറണാകുളം ചമ്പക്കര മീൻ മാർക്കറ്റിൽ നിന്നും പഴകിയ മത്സ്യം പിടിച്ചെടുത്തു. കോർപ്പറേഷൻ ആരോഗ്യ വിഭാഗം നടത്തിയ മിന്നൽ പരിശോധനയിലാണ് പഴകിയ മത്സ്യം പിടിച്ചെടുത്തത്. കർണാടകയിൽ നിന്നുമെത്തിയ ലോറിയിൽ നിന്നാണ് അഴുകിയ മീൻ കണ്ടെത്തിയതെന്ന് ആരോഗ്യ വകുപ്പ് ഉദ്യോഗസ്ഥർ വ്യക്തമാക്കി.
തമിഴ്നാട്, കർണാടക, ആന്ധ്രാ പ്രദേശ് അടക്കമുള്ള സസ്ഥാനങ്ങളിൽ നിന്ന് പഴകിയ മീനുകൾ കൊച്ചിയിലേക്ക് എത്തുന്നു എന്ന വിവരത്തിൻറെ അടിസ്ഥാനത്തിലാണ് ആരോഗ്യ വകുപ്പ് പരിശോധന നടത്തിയത്. രാവിലെ ഏഴ് മണിയോടെ മാർക്കറ്റിലെത്തിയ ലോറിയിൽ നിന്ന് മത്സ്യം ഇറക്കുന്നതിന് മുമ്പാണ് ആരോഗ്യ വിഭാഗം ഉദ്യോഗസ്ഥർ പരിശോധന നടത്തിയത്. വാഹനത്തിൽ മതിയായ ഫ്രീസിംഗ് സംവിധാനം ഉണ്ടായിരുന്നില്ലെന്നും ആരോഗ്യവിഭാഗം അധികൃതർ പറഞ്ഞു.
