നിയമസഭാ തിരഞ്ഞെടുപ്പിൽ ധര്മടത്ത് മുഖ്യമന്ത്രി പിണറായി വിജയനെതിരെ മത്സരിക്കാനില്ലെന്ന് കെ സുധാകരന്. എല്ലാ മണ്ഡലങ്ങളിലും പ്രചാരണത്തിന് എത്തേണ്ടതിനാല് മത്സരിക്കാന് കഴിയില്ലെന്ന് സുധാകരന് വ്യക്തമാക്കി.
ധര്മടത്ത് മത്സരിക്കാന് കെ സുധാകരന് മേല് കെപിസിസി നേതൃത്വവും കണ്ണൂരിലെ കോണ്ഗ്രസ് പ്രവര്ത്കരും സമ്മര്ദം ചെലുത്തിയിരുന്നു. കെ സുധാകരന് സ്ഥാനാര്ഥിയാകണമെന്നാണ് ആഗ്രഹമെന്ന് ഇന്ന് രാവിലെ കെപിസിസി അധ്യക്ഷന് മുല്ലപ്പള്ളി രാമചന്ദ്രന് പറഞ്ഞു. പിന്നാലെ കണ്ണൂരിലെ പ്രവര്ത്തകര് സുധാകരന്റെ വീട്ടിലെത്തി ഇതേ ആവശ്യം ഉന്നയിച്ചു.
“ഒരു മുഖ്യമന്ത്രി മത്സരിക്കുന്ന മണ്ഡലത്തില് സ്ഥാനാര്ഥിയാകുമ്പോള് ഒരുപാട് കാര്യങ്ങള് ആലോചിക്കാനുണ്ട്. ഒന്നും ആലോചിക്കാതെ തീരുമാനം എടുക്കാന് പറ്റുമോ? എനിക്കിത് നേതാക്കളും പ്രവര്ത്തകരുമായി ആലോചിക്കണം. പല ഭാഗത്ത് നിന്നും സമ്മര്ദമുണ്ട്. വരുംവരായ്കകള് ആലോചിച്ച് ഒരു മണിക്കൂറിനുള്ളില് തീരുമാനമെടുക്കും”. പക്ഷേ ഒരു മണിക്കൂര് കഴിഞ്ഞ് സുധാകരന് അറിയിച്ചത് മത്സരിക്കാനില്ലെന്നാണ്.
