കൊൽക്കത്ത: കൊൽക്കത്തയിലെ ദുർഗാ പൂജ പന്തലിൽ തിക്കിലും തിരക്കിലും പെട്ട് 17 പേർ ദാരുണമായി മരിച്ച സംഭവത്തിൽ അനുശോചനം രേഖപ്പെടുത്തി പ്രധാനമന്ത്രി നരേന്ദ്ര മോദി. മരിച്ചവരുടെ അടുത്ത ബന്ധുക്കൾക്ക് പ്രധാനമന്ത്രിയുടെ ദേശീയ ദുരിതാശ്വാസ നിധിയിൽ നിന്ന് 2 ലക്ഷം രൂപ വീതവും, പരിക്കേറ്റവർക്ക് 50,000 രൂപ വീതവും ധനസഹായം നൽകുമെന്ന് അദ്ദേഹം പ്രഖ്യാപിച്ചു. ദുരിതബാധിതർക്ക് പ്രാദേശിക ഭരണകൂടം സാധ്യമായ എല്ലാ സഹായങ്ങളും നൽകുന്നുണ്ടെന്നും പ്രധാനമന്ത്രി വ്യക്തമാക്കി. രാഷ്ട്രപതി ദ്രൗപതി മുർമുവും സംഭവത്തിൽ അഗാധമായ ദുഃഖം രേഖപ്പെടുത്തി.
പശ്ചിമ ബംഗാളിൽ നിശ്ചയിച്ചിരുന്ന തന്റെ എല്ലാ ഔദ്യോഗിക പരിപാടികളും അമിത് ഷാ റദ്ദാക്കിയിട്ടുണ്ട്. മുഖ്യമന്ത്രി സുവേന്ദു അധികാരിയുമായി സംസാരിച്ചതായും, പരിക്കേറ്റവർക്ക് ഏറ്റവും മികച്ച വൈദ്യചികിത്സ ഉറപ്പാക്കുമെന്നും അമിത് ഷാ എക്‌സിൽ കുറിച്ചു. ശനിയാഴ്ച (ഒക്ടോബർ 17) ചോർബഗൻ സർബോജനിൻ ദുർഗാ പൂജ പന്തലിലാണ് വൻ ദുരന്തം ഉണ്ടായത്. മഴയെത്തുടർന്ന് പന്തലിൽ വൻ ജനക്കൂട്ടം തടിച്ചുകൂടിയിരുന്നു. വൈകുന്നേരം 7:40-ഓടെ പന്തലിന്റെ എക്സിറ്റ് ഗേറ്റിലുണ്ടായ തിക്കും തിരക്കും ദുരന്തത്തിൽ കലാശിക്കുകയായിരുന്നു. പരിക്കേറ്റവരെ ഉടൻ തന്നെ കൊൽക്കത്ത മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. മുഖ്യമന്ത്രി സുവേന്ദു അധികാരിയും ആരോഗ്യമന്ത്രി ഡോ. ശരദ്വത് മുഖർജിയും ആശുപത്രിയിലെത്തി സ്ഥിതിഗതികൾ വിലയിരുത്തി. പോലീസ് ഉദ്യോഗസ്ഥരും ദുരന്തനിവാരണ സേനയും സ്ഥലത്തെത്തി രക്ഷാപ്രവർത്തനങ്ങൾക്ക് നേതൃത്വം നൽകി.
