ദില്ലി: ഇന്ത്യയിൽ അടുത്ത മാസം ഇരുപത്തി മൂന്ന് മുതൽ കല്യാണക്കാലമാണ്. രാജ്യത്ത് ഉടനീളം ഉള്ള കണക്കുകൾ എടുത്താൽ മൂന്നര മില്യൺ കല്യാണങ്ങളാണ് വരും ദിവസങ്ങളിൽ നടക്കാനുള്ളത്. നവംബർ 13 മുതൽ ഡിസംബർ 15 വരെയുള്ള ദിവസങ്ങളിലാണ് ഇത്രയും കല്യാണങ്ങൾ നടക്കുക. കോൺഫഡേറഷൻ ഓഫ് ഇന്ത്യൻ ട്രേഡേഴ്സ് ആണ് കല്യാണ കണക്ക് പുറത്ത് വിട്ടിരിക്കുന്നത്. ആഭരണം, വസ്ത്രം, ഭക്ഷണം, കല്യാണ അലങ്കാരങ്ങൾ തുടങ്ങിയ ആവശ്യങ്ങൾക്കായി നാലേകാൽ ലക്ഷം കോടി രൂപ വിപണിയിലേക്ക് എത്തുമെന്നാണ് പ്രതീക്ഷിക്കുന്നത്. നടക്കാനിരിക്കുന്ന കല്യാണങ്ങളിൽ ആവട്ടെ 50000ത്തിൽ അധികം വിവാഹങ്ങൾ അത്യാഡംബര വിവാഹങ്ങളാണ്. ഒരു കോടിയിലധികം രൂപയാണ് ഈ കല്യാണങ്ങൾക്ക് ചെലവ് . 32 ലക്ഷം വിവാഹങ്ങളാണ് കഴിഞ്ഞ വർഷം ഈ കാലയളവിൽ നടന്നത്. ഡൽഹിയിലാണ് ഏറ്റവും കൂടുതൽ ആളുകൾ ഈ ദിവസങ്ങളിൽ കതിർ മണ്ഡപത്തിൽ എത്തുക. മൂന്നര ലക്ഷം കല്യാണങ്ങളാണ് ഈ ദിവസങ്ങളിൽ ദില്ലിയിൽ മാത്രം തീരുമാനിച്ചിരിക്കുന്നത്. ഒരു ലക്ഷം കോടി രൂപയോളം ഇതിന്റെ ചെലവിന്റെ ഭാഗമായി വിപണിയിൽ എത്തും.
