കോഴിക്കോട് കൂടരഞ്ഞി പെരുമ്പുളയിലെ കിണറ്റില് അകപ്പെട്ട പുലിയെ പിടികൂടി പുറത്തെത്തിച്ചു. കൂടരഞ്ഞി പെരുമ്പൂള മഞ്ഞക്കടവിൽ കൃഷിയിടത്തിലെ പൊട്ടക്കിണറ്റിൽ കണ്ടത് പുലിയെന്ന് സ്ഥിരീകരിച്ചതിന് ശേഷം വനം വകുപ്പ് നടത്തി ഊർജിതമായ പരിശോധന നടത്തിയിരുന്നു.
കഴിഞ്ഞ ദിവസം കിണറ്റിൽ സ്ഥാപിച്ച കാമറയിൽ പുലിയുടെ ദൃശ്യം പതിഞ്ഞു. ചൊവ്വ രാത്രിയാണ് പുലി കിണറ്റിലകപ്പെട്ടത്. പുലിയെ പിടികൂടാൻ വനം വകുപ്പ് ശനി ഉച്ചയോടെ കിണറ്റിൽ കൂട് സ്ഥാപിച്ചു. കൂട്ടിൽ കോഴിയേയും ഇറക്കി ശ്രമം നടത്തി നോക്കിയിരുന്നു.
മുക്കം അഗ്നിരക്ഷാ സേനയുടെ ട്രൈപ്പോഡ് സ്റ്റാൻഡ്, റോപ്പ്, പുള്ളി സിസ്റ്റം എന്നിവ ഉപയോഗിച്ചാണ് കിണറ്റിലേക്ക് കൂട് സുരക്ഷിതമായി ഇറക്കിയത്.
പരിശോധനയ്ക്ക് ശേഷം ഉള്ക്കാട്ടിലേക്ക് തുറന്നുവിടുന്നതിൽ ഉൾപ്പടെ തീരുമാനം എടുക്കുമെന്ന് അധികൃതർ അറിയിച്ചു.
