മന്ത്രി പി രാജീവിന്റെ റൂട്ട് മാറ്റിയെന്ന പേരില് സസ്പെന്ഡ് ചെയ്ത പൊലീസുകാരെ സര്വ്വീസില് തിരിച്ചെടുത്തു. കൺട്രോൾ റൂംഎസ് ഐ സാബു രാജൻ, സിവിൽ പൊലീസ് ഓഫീസർ സുനിൽ എന്നിവരുടെ സസ്പെൻഷനാണ് പിൻവലിച്ചത്. തിരുവനന്തപുരം സിറ്റി ഗ്രേഡ് എസ്ഐ സാബുരാജന്, സിപിഒ സുനില് എന്നിവര്ക്കെതിരായ നടപടിയാണ് പിന്വലിച്ചത്. സസ്പെന്ഷന് അനാവശ്യമെന്ന് ആക്ഷേപം ഉയര്ന്നിരുന്നു. പൊലീസ് സംഘടനകള് മുഖ്യമന്ത്രിയുടെ ഓഫീസില് പരാതിപ്പെട്ടതോടെയാണ് നടപടി.
തിരക്കും കുഴികളുമുള്ള വഴിക്ക് പകരം നല്ല വഴിയെ കൊണ്ടുപോയ ഉദ്യോഗസ്ഥനെ സസ്പെൻഡ് ചെയ്തത് വ്യാപക പ്രതിഷേധത്തിന് ഇടയാക്കിരുന്നു. നെയ്യാറ്റിൻകരയിൽ നിന്ന് എറണാകുളത്തേക്ക് പോകുന്നതിനിടെയായിരുന്നു സംഭവം. ഗതാഗതകുരുക്ക് ഒഴിവാക്കാൻ റൂട്ട് മാറ്റിയെന്നാണ് നടപടിക്ക് വിധേയരായ ഉദ്യോഗസ്ഥരുടെ വിശദീകരണം. എന്നാൽ പതിവ് റൂട്ട് മാറ്റിയതിൽ തിരുവനന്തപുരം സിറ്റി പൊലീസ് കമ്മീഷണറെ വിളിച്ച് മന്ത്രി പരാതി അറിയിച്ചു. മന്ത്രിക്ക് ബുദ്ധിമുട്ടും നീരസവുമുണ്ടാക്കിയെന്ന് കാട്ടിയാണ് ഉദ്യോഗസ്ഥരെ കമ്മീഷണർ ജി സ്പർജൻ കുമാർ സസ്പെൻഡ് ചെയ്തത്.
