കൊച്ചി: കേരള സര്വകലാശാല സെനറ്റിലേക്കുള്ള ഗവര്ണറുടെ നാമനിര്ദ്ദേശം ഹൈക്കോടതി റദ്ദാക്കി. സെനറ്റിലേക്ക് വിദ്യാര്ത്ഥി പ്രതിനിധികളിലായി നാലുപേരെയാണ് ഗവര്ണര് സ്വന്തം നിലയില് നാമനിര്ദേശം ചെയ്തിരുന്നത്. ഈ നടപടിയാണ് ഹൈക്കോടതി റദ്ദാക്കിയത്. ആറ് ആഴ്ചയ്ക്കുള്ളില് പുതിയ നാമനിര്ദേശം നടത്താന് ഹൈക്കോടതി ഗവര്ണറോട് നിര്ദേശിച്ചു.
സര്വകലാശാല രജിസ്ട്രാര് നല്കിയ പട്ടിക അവഗണിച്ചാണ് ഗവര്ണര് സ്വന്തം നിലയില് പ്രതിനിധികളെ നോമിനേറ്റ് ചെയ്തത്. ഹ്യുമാനിറ്റീസ്, സയന്സ്, ഫൈന് ആര്ട്സ്, സ്പോര്ട്സ് വിഭാഗങ്ങളിലാണ് ഗവര്ണര് സെനറ്റിലേക്ക് നാമനിര്ദേശം ചെയ്തത്. ഇവരെല്ലാം എബിവിപി പ്രവര്ത്തകരായിരുന്നു എന്നും രാഷ്ട്രീയ പശ്ചാത്തലം നോക്കിയാണ് നാമനിര്ദേശം ചെയ്തതെന്നുമായിരുന്നു പ്രധാന ആരോപണം.