അഫ്ഗാനിസ്താനില് ഇന്നലെ രാത്രിയിലുണ്ടായ ഭൂചലനത്തില് വന്നാശനഷ്ടം. 6.1 തീവ്രത രേഖപ്പെടുത്തിയ ഭൂചലനത്തില് 255 പേര് കൊല്ലപ്പെട്ടെന്ന് റിപ്പോര്ട്ട്. മരണസംഖ്യ ഇനിയും ഉയര്ന്നേക്കും. 155 പേര്ക്ക് പരിക്കേറ്റിട്ടുണ്ട്.
തെക്ക്-കിഴക്കന് നഗരമായ ഖോസ്റ്റില് നിന്ന് 44 കിലോമീറ്റര് അകലെയാണ് ഭൂചലനം ഉണ്ടായത്. ഭൂരിഭാഗം മരണങ്ങളും പക്ടിക പ്രവിശ്യയിലാണ്. കിഴക്കന് പ്രവിശ്യകളായ നംഗര്ഹാര്, ഖോസ്റ്റ് എന്നിവിടങ്ങളിലും മരണം റിപ്പോര്ട്ട് ചെയ്തിട്ടുണ്ട്.
അഫ്ഗാനിസ്ഥാന്റെ തലസ്ഥാനമായ കാബൂളിലും ഭൂചലനത്തിന്റെ പ്രകമ്പനം ഉണ്ടായി. കൂടാതെ പാക്കിസ്ഥാന്റെ തലസ്ഥാനമായ ഇസ്ലാമാബാദ്, മുല്ത്താന്, ക്വറ്റ തുടങ്ങിയ വിവിധ പ്രദേശങ്ങളിലും പ്രകമ്പനം ഉണ്ടായി. ഭൂചലനത്തിന്റെ കൂടുതല് വിവരങ്ങള് ലഭ്യമാകുന്നതേയുള്ളൂ. ഹെലികോപ്റ്റര് അടക്കം ഉപയോഗിച്ച് രക്ഷപ്രവര്ത്തനം നടത്തുന്നതിന്റെ ദൃശ്യങ്ങള് പുറത്തുവന്നിട്ടുണ്ട്.
