കോഴിക്കോട്: മോഷണക്കേസ് പ്രതിയെ കുന്ദമംഗലം പോലീസ് പിടികൂടി. ഒളവണ്ണ കുന്നത്ത് പാലം മുല്ലശ്ശേരി പറമ്പ് അനസ് (42) ആണ് പിടിയിലായത്. ഇയാള്‍ വാടകയ്ക്ക് താമസിച്ചിരുന്ന പുത്തൂര്‍ മഠത്തെ വീട്ടില്‍ വച്ചാണ് ശനിയാഴ്ച രാത്രി പോലീസ് പിടികൂടിയത്.
കഴിഞ്ഞവര്‍ഷം സെപ്റ്റംബര്‍ മാസം മുണ്ടക്കല്‍ സ്വദേശി രാജീവ് കുമാര്‍ എന്നയാളുടെ വീട്ടിന്റെ ഓട് പൊളിച്ച് അകത്തു കടന്നു മുപ്പതിനായിരം രൂപ വിലയുള്ള രണ്ട് മൊബൈല്‍ ഫോണുകളും 3500 രൂപയും മോഷ്ടിച്ച കേസില്‍ പ്രതിയാണ് ഇയാള്‍. മാവൂര്‍ പന്തീരാങ്കാവ് എന്നിവിടങ്ങളിലും ഇയാള്‍ക്കെതിരെ കേസുകള്‍ ഉണ്ട്. കുന്ദമംഗലം പോലീസ് സര്‍ക്കിള്‍ ശ്രീകുമാര്‍ എസ്‌ഐ മാരായ സനീത്, സുമേഷന്‍ സിപിഒ മാരായ ബിജു ,കൃഷ്ണന്‍, പ്രജീഷ് എന്നിവര്‍ ചേര്‍ന്നാണ് പ്രതിയെ പിടികൂടിയത്.
