കുന്ദമംഗലം : മർകസ് ഹയർ സെക്കൻഡറി സ്കൂളിലെ ഒമ്പതാം ക്ലാസ് വിദ്യാർഥികളായ രണ്ട് പേർക്ക് മർദ്ദനമേറ്റ സംഭവത്തിൽ പ്രതികൾക്കെതിരെ നിസ്സാര വകുപ്പ് ചുമത്തിയാണ് കേസെടുത്തത് എന്നാരോപിച്ചു നാട്ടുകാർ ആക്ഷൻ കമ്മിറ്റി രൂപവത്കരിച്ചു. കഴിഞ്ഞ ശനിയാഴ്ച ഉച്ചക്ക് സ്കൂളിൽ നിന്ന് പോകുമ്പോൾ എതിർവശത്ത് നിന്ന് വന്ന ബുള്ളറ്റ് വിദ്യാർഥികളെ ഇടിക്കുകയും ബൈക്ക് യാത്രകാരനോട് വിദ്യാർഥികൾ എന്തോ പറയുകയും ചെയ്തിരുന്നു. പിന്നീട് ബൈക്ക് യാത്രകാരൻ മറ്റൊരാളെയും കൂട്ടി വന്ന് വിദ്യാർഥികളെ അടിച്ചു വീഴ്ത്തുകയും തലക്കും മറ്റും മർദിക്കുകയും ചെയ്തു. കുന്ദമംഗലം പാലക്കൽ മാളിന് സമീപത്ത് വെച്ചാണ് മർദ്ദനമേറ്റത്. മർകസ് സ്കൂൾ പ്രിൻസിപ്പൾ ഇത് സംബന്ധിച്ച് പൊലീസിൽ പരാതി നൽകി. മർദ്ദനമേറ്റ വിദ്യാർഥികളെ ബീച്ച് ആശുപത്രിയിൽ പ്രവേശിപ്പിച്ചു. പ്രതികൾക്കെതിരെ ശക്തമായ നടപടി എടുത്തില്ലെങ്കിൽ പൊലീസ് സ്റ്റേഷൻ മാർച്ച് ഉൾപ്പെടെ നടത്തുമെന്നും ആക്ഷൻ കമ്മിറ്റി ഭാരവാഹികൾ വാർത്ത സമ്മേളനത്തിൽ അറിയിച്ചു. ചെയർമാൻ എം.വി. റഫീഖ്, കുരുവട്ടൂർ ഗ്രാമപഞ്ചായത്ത് അംഗം ശശികല പുനപ്പോത്തിൽ, കൺവീനർ വി.മുനീർ, സി.പി. ശിഹാബ്, വി.ടി.കബീർ എന്നിവർ പത്രസമ്മേളനത്തിൽ പങ്കെടുത്തു.
