തിരുവനന്തപുരം: മുകേഷിനെ പിന്തുണക്കുന്ന രീതിയില് സംസാരിച്ച സുരേഷ് ഗോപിയെ തള്ളി ബി.ജെ.പി സംസ്ഥാന പ്രസിഡന്റ് കെ.സുരേന്ദ്രന് രംഗത്തെത്തി. മുകേഷ് രാജിവെക്കണമെന്നാണ് പാര്ട്ടി നിലപാടെന്നും സുരേഷ് ഗോപി പാര്ട്ടിക്കൊപ്പം പ്രവര്ത്തിക്കണമെന്നുമായിരുന്നു സുരേന്ദ്രന്റെ പ്രതികരണം.
ധാര്മ്മികത ഉയര്ത്തിപ്പിടിക്കേണ്ട ബാധ്യത മുകേഷിനുണ്ട്. ഇഷ്ടക്കാര്ക്ക് എന്തുമാകാമെന്ന സര്ക്കാര് നിലപാടാണ് മുകേഷിന്റെ ധാര്ഷ്ട്യത്തിന് അടിസ്ഥാനം. കൊല്ലം എം.എല്.എയുടെ രാജി എഴുതി വാങ്ങാന് മുഖ്യമന്ത്രി പിണറായി തയ്യാറാകണം. ചലച്ചിത്ര മേഖലയിലെ അനാശാസ്യ പ്രവണതകള് കാണാതെ പോകരുത്. വരുന്നത് ഗുരുതരമായ ആരോപണം ആണെന്നും സുരേന്ദ്രന് പറഞ്ഞു.
സിനിമാ മേഖലക്കെതിരായ ആരോപണങ്ങള് മാധ്യമങ്ങളുടെ സൃഷ്ടിയാണെന്നായിരുന്നു സുരേഷ് ഗോപിയുടെ മറുപടി. മാധ്യമപ്രവര്ത്തകരോട് ക്ഷുഭിതനായാണ് സുരേഷ് ഗോപി പ്രതികരിച്ചത്. ഒരു വലിയ സംവിധാനത്തെ തകിടം മറിക്കുകയാണ് മാധ്യമങ്ങള്. അന്തിമ തീരുമാനം കോടതി സ്വീകരിക്കുമെന്നും സുരേഷ് ഗോപി പറഞ്ഞു.
” ഇത് നിങ്ങളുടെ തീറ്റയാണ്. ആടിനെ തമ്മില് തല്ലിച്ച് ചോരകുടിക്കുകയാണ്. നിങ്ങളത് വെച്ച് കാശുണ്ടാക്കിക്കോ. ഒരു കുഴപ്പവുമില്ല. പക്ഷേ വലിയൊരു സംവിധാനത്തെ തകിടം മറിക്കുകയാണ് നിങ്ങള്. ഈ വിഷയങ്ങളെല്ലാം കോടതിക്ക് മുന്നിലുണ്ട്. കോടതി ഇക്കാര്യത്തില് തീരുമാനം എടുക്കും. പരാതികളെല്ലാം ആരോപണത്തിന്റെ രൂപത്തിലാണ് നില്ക്കുന്നത്”- ഇങ്ങനെയായിരുന്നു സുരേഷ് ഗോപിയുടെ വാക്കുകള്.
