റിയാദ്: സൗദി തെക്കുപടിഞ്ഞാറന്‍ പ്രവിശ്യയിലെ ജിസാനില്‍ തൊഴിലാളികള്‍ സഞ്ചരിച്ച ബസ് അപകടത്തില്‍പെട്ട് മലയാളിയടക്കം 15 പേര്‍ മരിച്ചു. അരാംകോ റിഫൈനറി റോഡില്‍ തിങ്കളാഴ്ച രാവിലെയുണ്ടായ അപകടത്തില്‍ കൊല്ലം കേരളപുരം സ്വദേശി വിഷ്ണു പ്രസാദ് പിള്ള (31) ഉള്‍പ്പടെ ഒമ്പത് ഇന്ത്യക്കാരും മൂന്ന് നേപ്പാള്‍ സ്വദേശികളും മൂന്ന് ഘാന സ്വദേശികളുമാണ് മരിച്ചത്. എല്ലാവരും ജുബൈല്‍ എ.സി.ഐ.സി കമ്പനിയിലെ ജീവനക്കാരാണ്.
ഗുരുതരമായി പരിക്കേറ്റ 11 പേര്‍ ജിസാന്‍, അബഹ എന്നിവിടങ്ങളിലെ ആശുപത്രികളിലാണ്. മൃതദേഹങ്ങള്‍ ബെയ്ഷ് ജനറല്‍ ആശുപത്രി മോര്‍ച്ചറിയിലാണ്. രാവിലെ അരാംകോ പ്രൊജക്ടിലെ ജോലിസ്ഥലത്തേക്ക് 26 തൊഴിലാളികളുമായി പോകുകയായിരുന്ന എ.സി.ഐ.സി സര്‍വിസ് കമ്പനിയുടെ മിനി ബസിന് നേരെ ട്രെയിലര്‍ ഇടിച്ചുകയറുകയായിരുന്നു. സംഭവസ്ഥലത്ത് തന്നെ 15 പേരും മരിച്ചു.
ട്രെയിലറിന്റെ ഇടിയേറ്റ് പൂര്‍ണമായി തകര്‍ന്ന മിനി ബസില്‍നിന്നും സിവില്‍ ഡിഫന്‍സിന്റെ നേതൃത്വത്തില്‍ പരിക്കേറ്റവരെയും മൃതദേഹങ്ങളും പുറത്തെടുക്കുകയായിരുന്നു. കൊല്ലം കേരളപുരം ശശീന്ദ്ര ഭനത്തില്‍ പ്രസാദിന്റെയും രാധയുടെയും മകനാണ് മരിച്ച വിഷ്ണു. അവിവാഹിതനാണ്.
