ചെന്നൈ: തമിഴ്നാട് തേനി പെരിയകുളത്ത് മിനി ബസും കാറും കൂട്ടിയിടിച്ച് മൂന്ന് മലയാളികള് മരിച്ചു. ഒരാള്ക്ക് ഗുരുതരമായി പരുക്കേറ്റു. മരിച്ചത് കോട്ടയം സ്വദേശികളാണ്. കാറിലുണ്ടായിരുന്ന കുറവിലങ്ങാട് കുര്യം സ്വദേശികളായ ജെയിന് തോമസ്, സോണിമോന് കെ ജെ കാഞ്ഞിരത്തിങ്കല്, ജോബീഷ് തോമസ് അമ്പലത്തിങ്കല് എന്നിവരാണ് മരിച്ചത്. ഷാജി പി ഡി എന്നയാള്ക്കാണ് ഗുരുതരമായി പരുക്കേറ്റത്. അപകടത്തില് ടൂറിസ്റ്റ് ബസില് സഞ്ചരിച്ച 18 പേര്ക്കും പരുക്കേറ്റു. പരുക്കേറ്റവരെ തേനി മെഡിക്കല് കോളജില് പ്രവേശിപ്പിച്ചു.
ഇന്ന് പുലര്ച്ചെയാണ് അപകടമുണ്ടായത്. ഏര്ക്കാട് എന്ന സ്ഥലത്തേക്ക് പോവുകയായിരുന്നു മിനി ബസ്. തേനിയിലേക്ക് പോവുകയായിരുന്നു മാരുതി ഓള്ട്ടോ കാര്. കൂട്ടിയിടിയില് കാര് പൂര്ണമായി തകര്ന്നു. ബസ് റോഡില് തലകീഴായി മറിഞ്ഞു. കാറില് നാല് പേരാണ് ഉണ്ടായിരുന്നത്. മൂന്ന് പേര് സംഭവ സ്ഥലത്ത് തന്നെ മരിച്ചു. ഒരാള്ക്ക് ഗുരുതരമായി പരിക്കേറ്റു. ബസിലുണ്ടായിരുന്ന 18 പേര്ക്കും പരിക്കേറ്റെങ്കിലും ഗുരുതരമല്ല.
