ഇരട്ട വോട്ടുള്ളവര് ഒരു വോട്ട് മാത്രമേ രേഖപ്പെടുത്തുന്നുള്ളൂ എന്ന് ഉറപ്പുവരുത്താന് നടപടിയെടുക്കണമെന്ന് ഹൈക്കോടതി. വിഷയവുമായി ബന്ധപ്പെട്ട തിരഞ്ഞെടുപ്പ് കമ്മിഷന്റെ മാര്ഗരേഖ ഹൈക്കോടതി അംഗീകരിച്ചു. ഇരട്ടവോട്ടുള്ളവര് ബൂത്തിലെത്തിയാല് ഫോട്ടോ എടുക്കണമെന്നും സത്യവാങ്മൂലം വാങ്ങണമെന്നും കോടതി നിര്ദേശിച്ചു.
സംസ്ഥാനത്ത് നാല് ലക്ഷത്തി മുപ്പത്തിനാലായിരത്തിലധികം ഇരട്ടവോട്ടുണ്ടെന്നും ഇവ മരവിപ്പിക്കണമെന്നുമാണ് ചെന്നിത്തല ഹര്ജിയില് ആവശ്യപ്പെട്ടത്. ഇരട്ടവോട്ട് മരവിപ്പിക്കുന്നതിനൊപ്പം കള്ളവോട്ടിന് കൂട്ട് നിന്ന ഉദ്യോഗസ്ഥര്ക്കെതിരെ പ്രോസിക്യൂഷന് നടപടിക്കു നിര്ദ്ദേശം നല്കണമെന്നും ചെന്നിത്തല ഹര്ജിയില് ആവശ്യപ്പെട്ടിരുന്നു. കള്ളവോട്ട് തടയാനുള്ള നാലിന നിര്ദ്ദേശങ്ങളും ചെന്നിത്തല മുന്നോട്ടുവച്ചു.
പരിശോധനയില് 38,586 ഇരട്ടവോട്ടുകള് മാത്രമാണ് കണ്ടെത്തിയതെന്നാണ് തെരഞ്ഞെടുപ്പ് കമ്മിഷന് കോടതിയെ അറിയിച്ചത്. തെരഞ്ഞെടുപ്പ് പടിവാതില്ക്കല് എത്തിനില്ക്കെ പട്ടികയില് മാറ്റം വരുത്താനാകില്ലെന്നും കമ്മിഷന് കോടതിയെ അറിയിച്ചിരുന്നു.