കുന്ദമംഗലം ഗ്രാമപഞ്ചായത്തിൽ പ്രവൃത്തി പൂർത്തീകരിച്ച രണ്ട് റോഡുകളുടെ ഉദ്ഘാടനം പി.ടി.എ റഹീം എംഎൽഎ നിർവ്വഹിച്ചു. തെക്കണഞ്ചേരി ഇരുമ്പിടംകണ്ടി റോഡ്, ആലുങ്ങൽ തോട്ടുപുറത്ത് ഫുട്പാത്ത് എന്നിവയാണ് നവീകരിച്ച് തുറന്നുകൊടുത്തത്. എംഎൽഎ ഫണ്ടിൽ നിന്നാണ് ഈ പദ്ധതികൾക്കുള്ള തുക ലഭ്യമാക്കിയത്. തെക്കണഞ്ചേരി ഇരുമ്പിടംകണ്ടി റോഡിന് എംഎൽഎയുടെ ആസ്തി വികസന ഫണ്ടിൽ നിന്ന് 14.3 ലക്ഷം രൂപയും ആലുങ്ങൽ തോട്ടുപുറത്ത് ഫുട്പാത്തിന് എംഎൽഎയുടെ പ്രാദേശിക വികസന ഫണ്ടിൽ നിന്ന് 8.6 ലക്ഷം രൂപയുമാണ് അനുവദിച്ചിരുന്നത്.
കുന്ദമംഗലം ഗ്രാമപഞ്ചായത്ത് പ്രസിഡൻ്റ് ലിജി പുൽകുന്നുമ്മൽ അധ്യക്ഷത വഹിച്ചു. വൈസ് പ്രസിഡൻ്റ് വി അനിൽകുമാർ, സ്റ്റാൻഡിങ് കമ്മിറ്റി ചെയർപേഴ്സൺമാരായ യു.സി പ്രീതി, ശബ്ന റഷീദ്, ജില്ലാ പഞ്ചായത്ത് മെമ്പർ സുധ കമ്പളത്ത്, ബ്ലോക്ക് പഞ്ചായത്ത് മെമ്പർ ടി.പി മാധവൻ, എം.എം സുധീഷ് കുമാർ, ടി.എം നിഥിൻനാഥ്, പി സുരേഷ്, റോഡ് കമ്മിറ്റി കൺവീനർ പി മോഹനൻ എന്നിവർ സംസാരിച്ചു.
