നിയമസഭാ തിരഞ്ഞെടുപ്പിൽ യുഡിഎഫ് നേടിയ ഉജ്ജ്വല വിജയത്തിന് പിന്നാലെ ജനങ്ങളെ അഭിവാദ്യം ചെയ്തുകൊണ്ടുള്ള വി ഡി സതീശന്റെ ഫേസ്ബുക്ക് പോസ്റ്റ് സോഷ്യൽ മീഡിയയിൽ തരംഗമാകുന്നു. “മാറ്റാൻ ആളുണ്ടോ എന്ന് ചോദിച്ചില്ലേ… മാറ്റാൻ ഞങ്ങളുണ്ടെന്ന് അന്നേ പറഞ്ഞതല്ലേ” എന്ന വരികളിലൂടെ, സർക്കാരിനെതിരായ പോരാട്ടത്തിൽ യുഡിഎഫ് ഉയർത്തിയ ആത്മവിശ്വാസം ശരിയാണെന്ന് അദ്ദേഹം തെളിയിച്ചിരിക്കുകയാണ്. കേരളം വിജയിച്ചുവെന്നും ഇനി യുഡിഎഫ് നാടിനെ നയിക്കുമെന്നും വ്യക്തമാക്കിയ സതീശൻ, ഭരണമാറ്റത്തിനായുള്ള ജനങ്ങളുടെ ആഗ്രഹമാണ് ഈ വൻ വിജയത്തിന് പിന്നിലെന്നും കൂട്ടിച്ചേർത്തു.
വോട്ടെണ്ണൽ പുരോഗമിക്കുമ്പോൾ നൂറിലധികം സീറ്റുകളിൽ മികച്ച ഭൂരിപക്ഷത്തോടെ മുന്നേറിക്കൊണ്ട് യുഡിഎഫ് അധികാരം ഉറപ്പിച്ചു കഴിഞ്ഞു. വൈകുന്നേരം മൂന്ന് മണി വരെയുള്ള കണക്കുകൾ പ്രകാരം എൽഡിഎഫ് 34 സീറ്റുകളിലേക്ക് മാത്രമായി ചുരുങ്ങി. അതേസമയം, നേമത്തും ചാത്തന്നൂരും വിജയിച്ചുകൊണ്ട് ബിജെപിയും തങ്ങളുടെ സാന്നിധ്യം നിയമസഭയിൽ ഉറപ്പിച്ചു. ഓരോ മണ്ഡലത്തിലും യുഡിഎഫ് സ്ഥാനാർത്ഥികൾ നേടുന്ന വലിയ ഭൂരിപക്ഷം സംസ്ഥാനത്ത് ശക്തമായ ഭരണവിരുദ്ധ വികാരം നിലനിന്നിരുന്നു എന്നതിന്റെ വ്യക്തമായ തെളിവായി മാറുകയാണ്.
