വെള്ളിമാട്കുന്ന് ചിൽഡ്രൻസ് ഹോമിൽ നിന്ന് കാണാതായ എല്ലാ പെൺകുട്ടികളെയും കണ്ടെത്തി. ഒരു പെൺകുട്ടിയെ ഇന്നലെ മടിവാളയിലെ ഹോട്ടലില് നിന്നും , മറ്റൊരു പെൺകുട്ടിയെ ഇന്ന് രാവിലെ മണ്ഡ്യയില് നിന്നും അന്വേഷണ സംഘം കണ്ടെത്തിയിരുന്നു. ബാക്കി നാല് പേരെ നിലമ്പൂർ എടക്കരയിൽ നിന്നാണ് കണ്ടെത്തിയത്.
കോഴിക്കോട് നിന്ന് ആറ് പെൺകുട്ടികളും ബംഗളൂരുവിലേക്കാണ് പോയത്. ഇതിൽ രണ്ട് പേരെ ബംഗളൂരുവിൽ നിന്ന് തന്നെ പൊലീസ് കണ്ടെത്തി. ബാക്കി നാല് പെൺകുട്ടികൾ ബംഗളൂരുവിൽ നിന്ന് ട്രെയിൻ വഴി പാലക്കാട്ടെത്തിയപ്പോഴാണ് അന്വേഷണ സംഘം കണ്ടെത്തിയത്.
ഇന്നലെയാണ് കോഴിക്കോട് വെള്ളിമാടുകുന്നുള്ള ചില്ഡ്രന്ല് ഹോമില് നിന്ന് പെണ്കുട്ടികള് രക്ഷപെട്ടത്. സഹോദരിമാര് ഉള്പ്പെടെ ആറുപേരാണ് കൂട്ടത്തിലുണ്ടായിരുന്നത്. ഇതിൽ ഒരാളെ ഇന്നലെ തന്നെ ബാംഗ്ലൂരിൽ നിന്ന് പൊലീസ് കണ്ടെത്തിയിരുന്നു. ബംഗളൂരുവിലെ മടിവാളയില് നിന്നാണ് കുട്ടിയെ കണ്ടെത്തിയത്. കൂടെ ഉണ്ടായിരുന്ന മറ്റ് അഞ്ച് പേര് ഓടിരക്ഷപെട്ടിരുന്നു. കുട്ടികള് ട്രെയിന് മാര്ഗം ബംഗളൂരുവില് എത്തുകയായിരുന്നെന്നാണ് പൊലീസ് പറയുന്നത്. തുടര്ന്ന് മടിവാളയില് എത്തിയ കുട്ടികള് മലയാളികള് നടത്തുന്ന ഒരു ഹോട്ടലില് മുറിയെടുക്കാന് ശ്രമിച്ചു. സംശയം തോന്നിയ ജീവനക്കാര് കുട്ടികളോട് തിരിച്ചറിയല് കാര്ഡ് അടക്കമുള്ള രേഖകള് ആവശ്യപ്പെട്ടു.
രേഖകളില്ലാത്തതിനെ തുടര്ന്ന് രക്ഷപെടാന് ശ്രമിച്ചതോടെ ഹോട്ടല് ജീവനക്കാര് തടയുകയും പൊലീസില് വിവരമറിയിക്കുകയുമായിരുന്നു. ഇവരില് ഒരാളെ പിടികൂടി പൊലീസില് ഏല്പ്പിച്ചെങ്കിലും മറ്റ് അഞ്ച് കുട്ടികളും ഓടിരക്ഷപെടുകയായിരുന്നു. ഇവർക്കായുള്ള അന്വേഷണത്തിനാണ് ഇതോടെ അവസാനമായത്. ചിൽഡ്രൻസ് ഹോമിൽ നിന്ന് പോയതിന് പിന്നിലെ കാരണം കുട്ടികളോട് ചോദിച്ചറിയേണ്ടതുണ്ട്.
