ലോകരാജ്യങ്ങളുടെ ഉപരോധ നടപടികളിലൊന്നും തളരാതെ അതിശക്തമായി റഷ്യ യുക്രൈന് അധിനിവേശം തുടരുന്നതായി റിപ്പോര്ട്ടുകള്. ഇപ്പോൾ കിട്ടുന്ന വിവരമനുസരിച്ച് തീരദേശ നഗരമായ ബെര്ദ്യാന്സ്ക് റഷ്യന് സൈന്യം പിടിച്ചെടുത്തിട്ടുണ്ട് . നഗരം റഷ്യന് നിയന്ത്രണത്തിലെന്ന് മേയര് തന്നെ അറിയിച്ചു. തലസ്ഥാന നഗരമായ കീവ് റഷ്യന് സൈന്യം വളഞ്ഞത് കൊണ്ട് കുടുങ്ങിക്കിടക്കുന്നവര്ക്ക് ഭക്ഷണമോ വെള്ളമോ എത്തിക്കാനാകുന്നില്ലെന്ന് കീവ് മേയര് അറിയിച്ചു.
രാജ്യത്തെ ചില പ്രാദേശിക മാധ്യമങ്ങള് റിപ്പോര്ട്ട് ചെയ്യുന്നത് ഇന്നലെ അര്ദ്ധരാത്രിയോടെ തന്നെ കീവ് വളയാനുള്ള നീക്കങ്ങള് റഷ്യന് സൈന്യം ആരംഭിച്ചുകഴിഞ്ഞതായാണ് . കീവ് മുഴുവന് റഷ്യന് സൈന്യം വളഞ്ഞതായി ഉപഗ്രഹ ചിത്രങ്ങള് സ്ഥിരീകരിക്കുന്നുണ്ട്. രാത്രിയില് വെടിയൊച്ചകള് കേട്ടതായി പ്രദേശവാസികളും അറിയിച്ചിരുന്നു. പ്രദേശവാസികള് അനാവശ്യമായി പുറത്തിറങ്ങരുതെന്ന് ഭരണകൂടം മുന്നറിയിപ്പ് നല്കി.
ആണവായുധമുക്ത രാഷ്ട്രപദവി നീക്കുന്ന ഭരണഘടനാ ഭേദഗതി ബെലാറസ് പാസാക്കിയതും ആശങ്ക വര്ധിപ്പിക്കുന്നുണ്ട്. ഇതോടെ റഷ്യന് ആണവായുധങ്ങള് ബെലാറസില് വിന്യസിക്കാനുള്ള തടസം നീങ്ങി. യുക്രൈനെതിരെ ആണവായുധങ്ങള് ഉപയോഗിക്കുമെന്ന വല്ദിമിര് പുടിന്റെ ഭീഷണിക്ക് പിന്നാലെയാണ് നീക്കം.
