നയതന്ത്ര സ്വര്ണക്കടത്തുകേസ് പ്രതി സ്വപ്ന സുരേഷ് മുഖ്യമന്ത്രി പിണറായി വിജയനും കുടുംബാംഗങ്ങള്ക്കും എതിരെ നല്കിയ രഹസ്യമൊഴി എന്ഫോഴ്സ്മെന്റ് ഡയറക്ടറേറ്റ് സുപ്രീം കോടതിക്കു കൈമാറും. ജൂണ് 6 നും 7 നുമാണ് സ്വപ്ന മജിസ്ട്രേറ്റ് കോടതിയില് രഹസ്യമൊഴി നല്കിയത്.
മൊഴിയില് മുഖ്യമന്ത്രിക്കും, കുടുംബാംഗങ്ങള്ക്കും, ശിവശങ്കറും ഉള്പ്പെടയുള്ള ചില ഉന്നതര്ക്കും എതിരെ ഗൗരവ സ്വഭാവമുള്ള ആരോപണങ്ങള് ഉന്നയിച്ചിരുന്നു. ആരോപണങ്ങളുടെ ഗൗരവ സ്വഭാവം കണക്കിലെടുത്ത് മൊഴി പരസ്യപ്പെടുത്തരുതെന്ന് മജിസ്ട്രേറ്റ് കോടതി നിര്ദേശിച്ചിട്ടുണ്ട്. അതിനാല് മൊഴി മുദ്ര വച്ച കവറില് സുപ്രീം കോടതിയില് സമര്പ്പിക്കാം എന്നാണ് ഇഡി സുപ്രീം കോടതിയെ അറിയിച്ചിരിക്കുന്നത്. മുതിര്ന്ന അഭിഭാഷകരുടെ നിയമോപദേശം ലഭിച്ചതിന് പിന്നാലെയാണ് രഹസ്യമൊഴി സുപ്രീം കോടതിയില് സമര്പ്പിക്കാന് തീരുമാനിച്ചത്.
