ലക്ഷദ്വീപിലെ പുതിയ അഡ്മിനിസ്ട്രേറ്ററുടെ ഭരണ പരിഷ്കാരങ്ങള്ക്കെതിരെ നല്കിയ ഹര്ജിയില് നിലപാടറിയിക്കാന് കേന്ദ്രസര്ക്കാരിന് ഹൈക്കോടതി നിര്ദേശം. അഡ്മിനിസ്ട്രേറ്ററുടെ നടപടികള്ക്കെതിരെ പ്രതിഷേധം തുടരുന്നതിനിടെ,അഡ്മിനിസ്ട്രേറ്റര് പ്രഫുല് പട്ടേലിന്റെ പരിഷ്കാര നടപടികള് റദ്ദാക്കണമെന്നാവശ്യപ്പെട്ട് സമര്പ്പിച്ച പൊതുതാത്പര്യ ഹര്ജിയിലാണ് ഹൈക്കോടതിയുടെ ഉത്തരവ്.
വിവാദ ഉത്തരവുകള് നയപരമായ വിഷയമാണെന്നാണ് ഹൈക്കോടതിയുടെ കണ്ടെത്തല്.
വിഷയത്തില് വിശദീകരണം നല്കുന്നതിന് കേന്ദ്രത്തിനും ലക്ഷദ്വീപ് ഭരണകൂടത്തിനും രണ്ടാഴ്ചത്തെ സമയം കോടതി അനുവദിച്ചിട്ടുണ്ട്. ഹര്ജിയില് എതിര് സത്യവാങ്മൂലമുണ്ടെങ്കില് സമര്പ്പിക്കാന് കേന്ദ്രത്തിനായി ഹാജരായ അഡീഷണല് സോളിസിറ്റര് ജനറല് കെ.എം.നടരാജനോട് കോടതി നിര്ദേശിക്കുകയായിരുന്നു.
വിശദീകരണം നല്കുന്നത് വരെ വിവാദ ഉത്തരവുകള് സ്റ്റേ ചെയ്യണമെന്ന ഹര്ജിക്കാരന്റെ ആവശ്യം കോടതി തള്ളി. അതിന് ഈ ഘട്ടത്തില് കഴിയില്ലെന്നും വിശദീകരണം പരിശോധിച്ച ശേഷം തുടര്നടപടികളിലേക്ക് കടക്കാമെന്നും ഡിവിഷന് ബെഞ്ച് വ്യക്തമാക്കി. ലക്ഷദ്വീപ് വിഷയത്തില് മറ്റൊരുപൊതുതാത്പര്യ ഹര്ജി കൂടി ഇന്ന് അടിയന്തരമായി പരിഗണിക്കണമെന്ന ആവശ്യവും കോടതി തള്ളി.
