തിരുവിതാംകൂര് ദേവസ്വം ബോര്ഡിനു കീഴിലെ പല ക്ഷേത്രങ്ങളിലും പൂജയ്ക്ക് ഉപയോഗിക്കുന്ന ചന്ദനവും, ഭസ്മവും ഉള്പ്പെടെയുള്ള പൂജ സാധനങ്ങള് ഗുണനിലവാരം ഇല്ലാത്തതാണെന്ന് ജസ്റ്റിസ് കെ ടി ശങ്കരന് കമ്മീഷന് റിപ്പോര്ട്ട്. ചീഫ് ജസ്റ്റിസ് ഡി വൈ ചന്ദ്രചൂഡ് അധ്യക്ഷനായ സുപ്രീംകോടതി ബെഞ്ച് റിപ്പോര്ട്ട് ഇന്നു പരിഗണിക്കും. കൃത്രിമ ചന്ദനവും രാസവസ്തുക്കള്കൊണ്ട് നിര്മ്മിക്കുന്ന ഭസ്മവും വിഗ്രഹങ്ങള് കേടാക്കുന്നുവെന്ന് ഭക്തര് വിശ്വസിക്കുന്നതായും റിപ്പോര്ട്ടില് പരാമര്ശിച്ചിട്ടുണ്ട്. മഞ്ഞളും, രാമച്ചവും, ചന്ദനവും പൊടിച്ച് പ്രസാദമായി നല്കുന്ന കാര്യം ബോര്ഡ് ആലോചിക്കണമെന്നും റിപ്പോര്ട്ടില് ആവശ്യപ്പെട്ടിട്ടുണ്ട്. യഥാര്ഥ ചന്ദനത്തിന് ഉയര്ന്ന വില ആയതിനാലാണ് ഗുണനിലവാരം കുറഞ്ഞ കൃത്രിമ ചന്ദനം ഉപയോഗിക്കുന്നതെന്നും റിപ്പോര്ട്ടില് പറയുന്നു.ക്ഷേത്രങ്ങളില് ഉപയോഗിക്കുന്ന ഗുണനിലവാരം കുറഞ്ഞ കൃത്രിമ ചന്ദനം നിര്മിക്കുന്നത് തമിഴ്നാട്ടിലാണ്. അതിന്റെ നിര്മ്മാണത്തിനായി ഉപയോഗിക്കുന്ന വസ്തുക്കള് എന്താണെന്ന് പോലും അറിയില്ലെന്ന് റിപ്പോര്ട്ടില് പരാമര്ശിച്ചിട്ടുണ്ട്
