കൊടകര കുഴൽപണ കേസിൽ എൻഫോഴ്സ്മെന്റ് ഡയറക്ട്രേറ്റ് അന്വേഷണം നടത്തണമെന്നുള്ള ഹർജിയിൽ പത്ത് ദിവസത്തിനുള്ളിൽ മറുപടി നൽകണമെന്ന് ഇഡിയോട് ഹൈക്കോടതി.
നിയമസഭാ തെരഞ്ഞെടുപ്പിൽ ചെലവഴിക്കാൻ കൊണ്ടുവന്ന കള്ളപ്പണമാണ് പിടികൂടിയത് എന്ന് ആരോപണം ഉയർന്നിട്ടും ഇഡി ഉദ്യോഗസ്ഥർ നടപടിയെടുത്തില്ലെന്ന് ചൂണ്ടിക്കാട്ടി ലോക് താന്ത്രിക് യുവജനതാദൾ ദേശീയ പ്രസിഡന്റ് സലിം മടവൂരാണ് ഹർജി സമർപ്പിച്ചത്.കള്ളപ്പണം വെളുപ്പിക്കൽ തടയൽ പ്രകാരം കേസെടുക്കണമെന്ന് ഇഡി ഡയറക്ടർക്കും ഡെപ്യൂട്ടി ഡയറക്ടർക്കും പരാതി നൽകിയിട്ടും നടപടിയുണ്ടായില്ലെന്ന് ഹർജിയിൽ പറയുന്നു.
കേസിൽ ഒരാൾക്കൂടി അറസ്റ്റിലായിട്ടുണ്ട്. മങ്കട സ്വദേശി സുൽഫിക്കറാണ് പിടിയിലായത്. ബിജെപി തൃശൂർ ജില്ലാ പ്രസിഡന്റ് കെകെ അനീഷ്, ബിജെപി മധ്യമേഖലാ സംഘടനാ സെക്രട്ടറി എൽ പദ്മകുമാർ അടക്കമുള്ളവരെ അന്വേഷണ സംഘം ചോദ്യം ചെയ്തിരുന്നു.
