ശമ്പളം കിടാത്തതിന്റെ പേരിൽ ഡ്യൂട്ടിക്കിടെ ബാഡ്ജ് ധരിച്ച് പ്രതിഷേധിച്ച വനിതാ കണ്ടക്ടറെ സ്ഥലം മാറ്റിയ നടപടി പിൻവലിച്ച് കെ എസ് ആർ ടി സി. വൈക്കം ഡിപ്പോയിലെ കണ്ടക്ടറായ അഖിലയെ വൈക്കത്തുനിന്ന് പാലക്കാട്ടേക്ക് സ്ഥലം മാറ്റിയ ഉത്തരവാണ് റദ്ദാക്കിയത്.
അതേ സമയം, അഖില പ്രദര്ശിപ്പിച്ച ബാഡ്ജിലെ കാര്യങ്ങള് വസ്തുത വിരുദ്ധമാണെന്ന് മന്ത്രി ആന്റണി രാജു പറഞ്ഞു. അഖിലയ്ക്കെതിരായ നടപടി സര്ക്കാര് അറിഞ്ഞ വിഷയമല്ല, എന്താണ് സംഭവിച്ചതെന്ന് പരിശോധിക്കാമെന്നും മന്ത്രി നേരത്തെ പറഞ്ഞിരുന്നു. വനിത കണ്ടക്ടറെ സ്ഥലം മാറ്റിയ നടപടി താഴേത്തട്ടിലോ മറ്റോ എടുത്തതാകാം. ശമ്പളം ലഭിക്കാത്തതിന് മുമ്പും പ്രതിഷേധങ്ങളുണ്ടായിട്ടുണ്ട്. അതൊന്നും സര്ക്കാരിനെ അപകീര്ത്തിപെടുത്തുന്നതല്ല. സ്ഥലം മാറ്റത്തില് യൂണിയനുകളുടെ പ്രതിഷേധത്തെ പറ്റി അറിഞ്ഞിട്ടില്ലെന്നും മന്ത്രി പറഞ്ഞിരുന്നു.
അഖില നടത്തിയ പ്രതിഷേധത്തിന്റെ ചിത്രം സാമൂഹിക മാധ്യമങ്ങളിൽ വൈറലായിരുന്നു. അഖിലയുടെ നടപടി സര്ക്കാരിനെയും കെഎസ്ആര്ടിസിയെയും അപകീര്ത്തിപ്പെടുത്തുന്നതായിരുന്നെന്ന് നടപടി ഉത്തരവില് മാനേജ്മെന്റ് പറഞ്ഞിരുന്നു.
