കുന്ദമംഗലം കാരന്തൂരിൽ കഴിഞ്ഞ ഞായറാഴ്ച തീപ്പിടിച്ചു കത്തിയമർന്ന ടിവിഎസ് ഷോറൂമിൽ ഫോറൻസിക് സംഘം പരിശോധന നടത്തി. സംഭവത്തിൽ ഫോറൻസിക് വിഭാഗവും കുന്ദമംഗലം പോലീസും അന്വേഷണനടപടികൾ ആരംഭിച്ചു.ഫോറൻസിക് ഓഫീസർമാരായ ഫാബിൽ, വിജയൻ, കുന്ദമംഗലം സബ് ഇൻസ്പെക്ടർ അനീഷ്,സി പി ഒ അജയൻ എന്നിവരാണ് പരിശോധന നടത്തിയത്.ഞായറാഴ്ച ഉച്ചയ്ക്ക് ഒന്നരമണിക്കാണ് സംഭവം. ഷോറൂമിന്റെ അകത്തുണ്ടായിരുന്ന പുതിയ ടി.വി.എസ് ഇരുചക്രവാഹനങ്ങളും സർവീസിനായി കൊണ്ടുവന്ന വാഹനങ്ങളും അഗ്നിക്കിരയായി. മുൻഭാഗത്ത് കാഴ്ചയ്ക്കായി വച്ചിരുന്ന ലോക്ക് ചെയ്തിരുന്ന വാഹനങ്ങൾ തീപിടിത്തം സംഭവിച്ച ഉടനെ നാട്ടുകാർ വലിച്ച് പുറത്തേക്ക് നീക്കിയിരുന്നു. അകത്തുണ്ടായിരുന്ന വാഹനങ്ങളും മറ്റ് സ്പെയർപാട്സുകളും ഓഫീസ്ഉപകരണങ്ങളും ഫയലുകളും പൂർണമായും കത്തിനശിച്ചു. ഞായറാഴ്ച കട അവധിയായിരുന്നെങ്കിലും രണ്ട് ജീവനക്കാർ ഷോപ്പിലുണ്ടായിരുന്നു.
