സീറോ മലബാര്‍ സഭ മേജര്‍ ആര്‍ച്ച് ബിഷപ് കര്‍ദിനാള്‍ മാര്‍ ജോര്‍ജ് ആലഞ്ചേരിയുമായി ബി.ജെ.പി നേതാക്കള്‍ കൂടിക്കാഴ്ച നടത്തി. ബി.ജെ.പി സംസ്ഥാന അധ്യക്ഷന്‍ കെ.സുരേന്ദ്രന്‍, കര്‍ണാടക ഉപമുഖ്യമന്ത്രി ഡോ.സി.എന്‍അശ്വത്ത് നാരായണ്‍ എന്നിവരാണ് കെ.സി.ബി.സി ആസ്ഥാനത്ത് എത്തി കൂടിക്കാഴ്ച നടത്തിയത്.സന്ദര്‍ശനം വ്യക്തിപരമായിരുന്നെന്നും പ്രഭാത ഭക്ഷണം കഴിക്കാനാണ് വന്നതെന്നും കെ.സുരേന്ദ്രന്‍ പ്രതികരിച്ചു. എല്ലാവരുമായി നല്ല സൗഹൃദത്തിലാണ് ബി.ജെ.പി സംസ്ഥാനത്ത്. വിജയയാത്രയുമായി ബന്ധപ്പെട്ട് എറണാകുളത്ത് വന്നപ്പോള്‍ കൂടിക്കാഴ്ച നടത്തിയതാണെന്നും സുരേന്ദ്രന്‍ പറഞ്ഞു. സംസ്ഥാനത്ത് നിയമസഭ തിരഞ്ഞെടുപ്പ് പ്രഖ്യാപിച്ച സാഹചര്യത്തില്‍ കൂടിക്കാഴ്ചയ്ക്ക് വലിയ രാഷ്ട്രീയ പ്രാധാന്യമുണ്ട്.
കേരളത്തിലെ തെരഞ്ഞെടുപ്പ് ചുമതലയുള്ള കര്‍ണാടക ഉപമുഖ്യമന്ത്രി അശ്വത് നാരായണും മാര്‍ ജോര്‍ജ് ആലഞ്ചേരിയുമായി കൂടിക്കാഴ്ച നടത്തി. നിയമസഭ തെരഞ്ഞെടുപ്പില്‍ ക്രിസ്ത്യന്‍ വോട്ടുകള്‍ എന്‍.ഡി.എ പ്രതീക്ഷിക്കുന്നതായി അദ്ദേഹം പ്രതികരിച്ചു. ക്രിസ്ത്യന്‍ വിഭാഗത്തില്‍ നിന്നും സ്ഥാനാര്‍ത്ഥികള്‍ ഉണ്ടാകുമെന്നും അശ്വത് നാരായണ്‍ പ്രതികരിച്ചു.
