ഷാരോണ് വധക്കേസ് തമിഴ്നാട് പോലീസിന് കൈമാറണമെന്ന് നിയമോപദേശം.കുറ്റകൃത്യം നടന്നത് തമിഴ്നാട്ടിലെ പളുകല് പൊലീസ് സ്റ്റേഷന് പരിധിയില് ആയതിനാല് കേരള പൊലീസ് അന്വേഷണം നടത്തുന്നത് ഉചിതമല്ലെന്നാണ് നിയമോപദേശത്തില് പറയുന്നത്. കൊലപാതകത്തിന്റെ ആസൂത്രണം നടപ്പിലാക്കിയതും തൊണ്ടിമുതലുകൾ കണ്ടെത്തിയതും തമിഴ്നാട് അതിർത്തിയിലാണ്. ഭാവിയിൽ പ്രതി പൊലിസ് അന്വേഷണത്തിന്റെ അധികാരപരിധി ചോദ്യം ചെയ്യാൻ സാധ്യതയുണ്ട്. മറ്റൊരു സംസ്ഥാനത്തേക്ക് കേസ് കൈമാറാനുളള തീരുമാനമെടുക്കേണ്ടത് ആഭ്യന്തര സെക്രട്ടറിയാണ്. കേസ് കൈമാറുന്നതിൽ മുഖ്യമന്ത്രിയുമായി ഡിജിപിയുമായി ചർച്ച നടത്തും.ഷാരോണ് വധക്കേസില് പരാതി ലഭിച്ചതും കേസ് രജിസ്റ്റര് ചെയ്തതും കേരളത്തിലെ പാറശ്ശാല പൊലീസാണ്. ഇതു പിന്നീട് ജില്ലാ ക്രൈംബ്രാഞ്ചിനു കൈമാറുകയായിരുന്നു. കുറ്റകൃത്യം നടന്നത് തമിഴ്നാട്ടില് ആയതിനാല് അന്വേഷണവുമായി മുന്നോട്ടുപോവുന്നതില് നിയമപ്രശ്നമുണ്ടോ എന്നറിയാനാണ്, ക്രൈംബ്രാഞ്ച് നിയമോപദേശം തേടിയത്.
