ആലപ്പുഴ: ആലപ്പുഴ കളര്കോട് കെഎസ്ആര്ടിസി ബസും കാറും കൂട്ടിയിടിച്ച് അഞ്ച് എംബിബിഎസ് വിദ്യാര്ത്ഥികള് മരിച്ച സംഭവത്തില് വാഹനം ഓടിച്ച വിദ്യാര്ത്ഥിയെ പ്രതി ചേര്ത്തുവെന്ന് പൊലീസ്. പ്രാഥമിക വിവരങ്ങളുടെ അടിസ്ഥാനത്തില് ആദ്യം കെഎസ്ആര്ടിസി ഡ്രൈവറെ പ്രതിയാക്കിയാണ് എഫ്ഐആര് രജിസ്റ്റര് ചെയ്തതെന്നും റിപ്പോര്ട്ടിലുണ്ട്. മുന്പില് ഉണ്ടായിരുന്ന വാഹനത്തെ മറികടക്കുന്നതിനിടെ ഉദ്ദേശിച്ച വേഗം കിട്ടിയില്ലെന്നും, ബ്രേക്ക് ചവിട്ടിയെങ്കിലും വാഹനം നിയന്ത്രണം വിടുകയായിരുന്നുവെന്നും ഗൗരീശങ്കര് മൊഴി നല്കിയിട്ടുണ്ട്. നിയന്ത്രണം വിട്ട വാഹനം വലതുവശത്തേക്ക് തെന്നിമാറിയാണ് ബസില് ഇടിച്ച് കയറിയതെന്നും ഗൗരീശങ്കര് പോലീസിന് നല്കിയ മൊഴിയില് പറയുന്നു.
കഴിഞ്ഞ തിങ്കളാഴ്ച രാത്രിയാണ് നാടിനെയാകെ നൊമ്പരത്തിലാഴ്ത്തിയ ദാരുണമായ വാഹനാപകടം ഉണ്ടായത്. പാലക്കാട് സ്വദേശി ശ്രീദേവ് വത്സന്, മലപ്പുറം കോട്ടക്കല് സ്വദേശി ദേവനന്ദന്, കണ്ണൂര് സ്വദേശി മുഹമ്മദ് അബ്ദുല് ജബ്ബാര്, ലക്ഷദ്വീപ് സ്വദേശി മുഹമ്മദ് ഇബ്രാഹിം, കോട്ടയം സ്വദേശി ആയുഷ് ഷാജി എന്നിവരാണ് അപകടത്തില് മരിച്ചത്. രണ്ട് മാസം മുമ്പാണ് അഞ്ച് പേരും ആലപ്പുഴ മെഡിക്കല് കോളേജില് എംബിബിഎസിന് ചേര്ന്നത്. കാറില് 11 പേരുണ്ടായിരുന്നു ഉണ്ടായിരുന്നത്. ആലപ്പുഴയിലേക്ക് സിനിമയ്ക്ക് പോകുകയായിരുന്നു യുവാക്കള്. ഇവര് സഞ്ചരിച്ചിരുന്ന കാര് നിയന്ത്രണം തെറ്റി എതിരെ വന്ന കെഎസ്ആര്ടിസി സൂപ്പര് ഫാസ്റ്റ് ബസിലേക്ക് ഇടിച്ചു കയറുകയായിരുന്നു. കാര് വെട്ടിപ്പൊളിച്ചാണ് വിദ്യാര്ത്ഥികളെ പുറത്ത് എടുത്തത്. കാറിലുണ്ടായിരുന്ന മറ്റ് ആറ് പേര് ചികിത്സയില് തുടരുകയാണ്. ഇതില് രണ്ട് പേരുടെ നില ഗുരുതരമാണ്. ബസ് യാത്രക്കാരായ രണ്ട് സ്ത്രീകളും അപകടത്തില് പരിക്കേറ്റ് ചികിത്സയിലാണ്.
