തിരുവനന്തപുരം: മംഗലാപുരത്ത് എന്ഡിഎ നേതാക്കളുമായി വി ഡി സതീശന് കൂടിക്കാഴ്ച നടത്തിയെന്ന വാര്ത്തയില് കോണ്ഗ്രസ് നേതൃത്വം വ്യക്തത വരുത്തണമെന്ന് എല്ഡിഎഫ് കണ്വീനര് ടി പി രാമകൃഷ്ണന് പറഞ്ഞു. മെയ് ഒന്നിന് രാവിലെ പ്രത്യേക വിമാനത്തില് സതീഷന് മംഗലാപുരത്തേക്ക് പോയെന്നും, സ്വര്ണക്കവര്ച്ചയില് എസ്ഐടി ചോദ്യംചെയ്ത റെജികുമാര് എന്ന വ്യക്തി ഒപ്പം ഉണ്ടായിരുന്നുവെന്നുമാണ് വാര്ത്തകള് വന്നത്. ഈ യാത്രയില് അദാനിഗ്രൂപ്പിന്റെ പ്രസിഡന്റിനെ സതീശന് കാണുകയുണ്ടായി. കര്ണാടകയിലെ എന്ഡിഎ നേതാവായ ബി എം ഫാറൂഖിന്റെ വസതിയില്വെച്ചാണ് കൂടിക്കാഴ്ച നടത്തിത്. ഇത് സംബന്ധിച്ച് കര്ണാടക കോണ്ഗ്രസ് കമ്മിറ്റി എഐസിസി നേതൃത്വത്തിന് പരാതി നല്കിയെന്ന വാര്ത്തയും പുറത്തുവന്നു. വളരെ ഗുരുതരമായ വാര്ത്തയാണ് പുറത്തുവന്നിരിക്കുന്നതെന്നും കെപിസിസി, എഐസിസി നേതൃത്വങ്ങള് ഇതില് വിശദീകരണം നല്കണമെന്നും എല്ഡിഎഫ് കണ്വീനര് വാര്ത്താസമ്മേളനത്തില് ആവശ്യപ്പെട്ടു.
