തൃശ്ശൂർ:സംസ്ഥാന സ്കൂൾ കലോത്സവത്തിൽ പങ്കെടുക്കാനായി കേരളത്തിന്റെ വിവിധ ജില്ലകളിൽ നിന്ന് ആയിരക്കണക്കിന് വിദ്യാർത്ഥി–വിദ്യാർത്ഥിനികൾ ഇന്നലെയും ഇന്നുമായി തൃശ്ശൂരിലെത്തി കൊണ്ടിരിക്കയാണ്. ട്രെയിനിലും മറ്റ് ഗതാഗത മാർഗങ്ങളിലുമായി നടത്തിയ അവരുടെ അതിരാവിലെ തുടങ്ങുന്ന യാത്ര പാട്ടും കഥപറച്ചിലും നിറഞ്ഞ സന്തോഷ നിമിഷങ്ങളാൽ നിറഞ്ഞതായിരുന്നു.
വിവിധ സ്കൂളുകളിലെ കുട്ടികൾ അധ്യാപകരുടെയും ചില രക്ഷിതാക്കളുടെയും നേതൃത്വത്തിലാണ് കലോത്സവ നഗരിയിലേക്കെത്തി കൊണ്ടിരിക്കുന്നത്
ട്രെയിൻ യാത്രക്കിടയിൽ കുട്ടികൾ കൂട്ടായി പാടിയും കളിച്ചും കഥകൾ പറഞ്ഞും സമയം ചെലവഴിച്ചതോടെ യാത്ര തന്നെ ഒരു ആഘോഷമായി മാറി. ജില്ലകളിലെ മത്സരങ്ങളിൽ മികവ് തെളിയിച്ച് സംസ്ഥാന തലത്തിലേക്ക് തിരഞ്ഞെടുക്കപ്പെട്ട കുട്ടികൾക്ക് കലോത്സവ വേദി വലിയ സ്വപ്നങ്ങളുടെയും പ്രതീക്ഷകളുടെയും വാതിലുകളാണ് തുറക്കുന്നത്. അവരുടെ കഴിവുകൾ സംസ്ഥാനത്തിന് മുന്നിൽ അവതരിപ്പിക്കാനുള്ള ആകാംക്ഷ യാത്രയിലുടനീളം കുട്ടികളുടെ മുഖത്ത് തെളിഞ്ഞിരുന്നു.
തൃശ്ശൂരിലെത്തുന്ന ടീമുകൾക്ക് കലോത്സവ കമ്മിറ്റി, സന്നദ്ധ പ്രവർത്തകർ, വിവിധ വകുപ്പുകളിലെ ഉദ്യോഗസ്ഥർ എന്നിവരുടെ നേതൃത്വത്തിൽ ഊഷ്മളമായ സ്വീകരണമാണ് ഒരുക്കിയിരിക്കുന്നത്. റെയിൽവേ സ്റ്റേഷനുകളിലും ബസ് സ്റ്റാൻഡുകളിലും സ്വീകരണ കൗണ്ടറുകൾ, വഴികാട്ടി സംവിധാനങ്ങൾ, താമസ സൗകര്യങ്ങളിലേക്കുള്ള ഗതാഗത ക്രമീകരണങ്ങൾ എന്നിവ ഒരുക്കിയിട്ടുണ്ട്. കുട്ടികളുടെ സുരക്ഷയും സൗകര്യവും ഉറപ്പാക്കുന്നതിനായി ആരോഗ്യ, ഭക്ഷണ, താമസ വിഭാഗങ്ങൾ ഏകോപിതമായി പ്രവർത്തിക്കുന്നു.
സംസ്ഥാനത്തിന്റെ വിവിധ ഭാഗങ്ങളിൽ നിന്നെത്തുന്ന കലാപ്രതിഭകളുടെ സംഗമമാണ് ഓരോ വർഷവും സംസ്ഥാന സ്കൂൾ കലോത്സവം. മത്സര വേദികളിൽ മാത്രമല്ല, യാത്ര മുതൽ സ്വീകരണം വരെ അനുഭവിക്കുന്ന കൂട്ടായ്മയും സൗഹൃദവും കുട്ടികളുടെ ജീവിതത്തിൽ മറക്കാനാവാത്ത ഓർമ്മകളായി മാറുമെന്ന് അധ്യാപകരും സംഘാടകരും പറയുന്നു.
കലയും സംസ്കാരവും ഒരുമിക്കുന്ന ഈ മഹോത്സവത്തിന് തൃശ്ശൂർ പൂരനഗരം ഒരുങ്ങിക്കഴിഞ്ഞു.
