മാന്നാര്‍: പ്രായപൂര്‍ത്തിയാകാത്ത ഭിന്നശേഷിക്കാരിയായ വിദ്യാര്‍ഥിനിയെ പീഡിപ്പിക്കാന്‍ ശ്രമിച്ച കേസില്‍ യുവാവ് അറസ്റ്റില്‍. ചെന്നിത്തല ഗോകുല്‍ നിവാസില്‍ ഗോകുല്‍ കൃഷ്ണന്‍ (33) ആണ് അറസ്റ്റിലായത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
2022ലാണ് കേസിനാസ്പദമായ സംഭവംനടന്നത്. പെണ്‍കുട്ടിയുടെ കുടുംബവുമായി അടുത്ത ബന്ധം പുലര്‍ത്തിയിരുന്ന പ്രതി മാതാപിതാക്കളില്ലാത്ത നേരം നോക്കി വീട്ടിലെത്തി പെണ്‍കുട്ടിയെ പീഡിപ്പിക്കാന്‍ ശ്രമിക്കുകയായിരുന്നു. സ്‌കൂളില്‍ നടന്ന കൗണ്‍സിലിങിലാണ് മൂന്ന് വര്‍ഷം മുമ്പ് നടന്ന സംഭവത്തെക്കുറിച്ച് പറയുന്നത്. സ്‌കൂള്‍ അധികൃതര്‍ ശിശുക്ഷേമ സമിതിയില്‍ വിവരമറിയിക്കുകയും സംഘടന വിവരം പൊലിസിനു കൈമാറുകയും ചെയ്തു.
മാന്നാര്‍ പൊലിസാണ് പ്രതിയെ അറസ്റ്റ് ചെയ്തത്. മാന്നാര്‍ പൊലീസ് ഇന്‍സ്‌പെക്ടര്‍ ഡി. രജീഷ് കുമാറിന്റെ നേതൃത്വത്തില്‍ എസ്.ഐ.സി.എസ്. അഭിരാം, വനിത എ.എസ്.ഐ. സ്വര്‍ണ്ണരേഖ, സീനിയര്‍ സി.പി.ഒ.മാരായ സാജിദ്, അജിത്, സി.പി.ഒ ഹരിപ്രസാദ് എന്നിവരടങ്ങിയ സംഘം നടത്തിയ അന്വേഷണത്തിലാണ് പ്രതിയെ അറസ്റ്റ് ചെയ്തത്.
