ഇറാൻ തുറമുഖങ്ങളെ ലക്ഷ്യമാക്കി ഏർപ്പെടുത്തിയ ഉപരോധം കർശനമാക്കുന്നതിന്റെ ഭാഗമായി, ഒരു ചരക്കുകപ്പലിനെ അമേരിക്കൻ നാവികസേന തടയുന്ന ദൃശ്യങ്ങൾ അമേരിക്കൻ സെൻട്രൽ കമാൻഡ് പുറത്തുവിട്ടു. യുഎസ്എസ് മൈക്കൽ മർഫി എന്ന യുദ്ധക്കപ്പൽ മോട്ടോർ വെസൽ മോളി എന്ന ചരക്കുകപ്പലിനെ തടഞ്ഞ് മറ്റൊരു ദിശയിലേക്ക് തിരിച്ചുവിടുന്നതാണ് ദൃശ്യങ്ങളിലുള്ളത്. ഉപരോധത്തെക്കുറിച്ച് ജീവനക്കാർക്ക് മുന്നറിയിപ്പ് നൽകിയ നാവികർ, കപ്പലിനെ സുരക്ഷിതമായി മറ്റൊരു തുറമുഖത്തേക്ക് അനുഗമിക്കുകയും ചെയ്തു. പതിനായിരത്തിലധികം സൈനികരും പന്ത്രണ്ടിലധികം യുദ്ധക്കപ്പലുകളും നൂറിലധികം വിമാനങ്ങളും ഉൾപ്പെടുന്ന വൻ സന്നാഹമാണ് ഈ സമുദ്ര ഉപരോധത്തിനായി വിന്യസിച്ചിരിക്കുന്നത്.
പാകിസ്ഥാനിൽ വെച്ച് ഇറാനുമായി നടത്തിയ ചർച്ചകൾ പരാജയപ്പെട്ടതിനെത്തുടർന്ന് പ്രസിഡന്റ് ഡോണൾഡ് ട്രംപ് പ്രഖ്യാപിച്ച ഹോർമുസ് പ്ലാനിന്റെ ഭാഗമായാണ് ഈ നടപടി. ഹോർമുസ് കടലിടുക്ക് പൂർണ്ണമായും അടച്ചിട്ടില്ലെന്നും ഇറാന്റെ തുറമുഖങ്ങളിലേക്കുള്ള പ്രവേശനം മാത്രമാണ് തടയുന്നതെന്നും അമേരിക്കൻ സേന വ്യക്തമാക്കി. ഒരു കപ്പൽ പോലും തങ്ങളെ മറികടന്ന് പോകുന്നില്ലെന്നും ഉപരോധം പൂർണ്ണ വിജയമാണെന്നും ട്രംപ് അവകാശപ്പെട്ടു. നിലവിൽ യുഎസ്എസ് എബ്രഹാം ലിങ്കൺ ഉൾപ്പെടെയുള്ള കപ്പലുകൾ അറബിക്കടലിൽ നിലയുറപ്പിച്ചിരിക്കുകയാണ്.
അമേരിക്കയും ഇറാനും തമ്മിൽ നിലവിൽ രണ്ടാഴ്ചത്തെ താൽക്കാലിക വെടിനിർത്തൽ നിലവിലുണ്ടെങ്കിലും തുറമുഖങ്ങൾക്കെതിരായ ഉപരോധത്തിൽ വിട്ടുവീഴ്ചയില്ലെന്ന് അമേരിക്ക അറിയിച്ചു. ആവശ്യമെങ്കിൽ എത്ര കാലം വേണമെങ്കിലും ഈ നടപടി തുടരാൻ സൈന്യം സജ്ജമാണെന്നാണ് അമേരിക്കൻ വൃത്തങ്ങൾ നൽകുന്ന സൂചന.
