ചെന്നൈ: തമിഴ് ചലച്ചിത്ര സംഗീത ലോകത്തെ പ്രശസ്ത സംഗീത സംവിധായകനും ഗായകനുമായ ദേവ (75) അന്തരിച്ചു. ചെന്നൈയിലെ സൂര്യ ആശുപത്രിയിൽ പ്രവേശിപ്പിച്ചതിന് പിന്നാലെയായിരുന്നു അന്ത്യം. തനതായ സംഗീത ശൈലി കൊണ്ട് ആരാധകർ ‘തേനിസൈ തെൻട്രൽ’ എന്ന് സ്‌നേഹത്തോടെ വിളിച്ചിരുന്ന അദ്ദേഹത്തിന്റെ വിയോഗം തെന്നിന്ത്യൻ സിനിമാ ലോകത്തിന് തീരാനഷ്ടമാണ്.
1950 നവംബർ 20-ന് ദേവനേശൻ ചൊക്കലിംഗം എന്ന പേരിൽ ജനിച്ച ദേവ, ഗാനമേളകളിലൂടെയാണ് സംഗീത യാത്ര ആരംഭിക്കുന്നത്. പിന്നീട് തമിഴ്, തെലുങ്ക്, കന്നഡ, മലയാളം ഭാഷകളിലായി മൂന്ന് പതിറ്റാണ്ടിലേറെ നീണ്ട കരിയറിൽ നൂറുകണക്കിന് സിനിമകൾക്ക് അദ്ദേഹം ഈണം പകർന്നു. തനത് നാടൻ പാട്ടുകളെയും ഗാനമേള ശൈലികളെയും സിനിമാ സംഗീതത്തിലേക്ക് കൂട്ടിയിണക്കിയതാണ് അദ്ദേഹത്തെ ജനപ്രിയനാക്കിയത്. സുമ്മാ ഇരുങ്ക മച്ചാൻ, ഉന്നിടത്തിൽ എന്നൈ കൊടുത്തേൻ, ഇംഗ്ലീഷ്കാരൻ തുടങ്ങി നിരവധി ചിത്രങ്ങളിൽ അദ്ദേഹം അഭിനയിക്കുകയും ചെയ്തിട്ടുണ്ട്.
90-കളിൽ തമിഴ് സിനിമയെ തരംഗമാക്കിയ ബാഷ, അണ്ണാമലൈ, ആസൈ, കാതൽ കോട്ടൈ, നേർക്കു നേർ, വാലി, കുഷി തുടങ്ങിയ സൂപ്പർഹിറ്റ് ചിത്രങ്ങളുടെ സംഗീതം ദേവയുടേതായിരുന്നു. മലയാളത്തിൽ ‘ദ പ്രിൻസ്’, ‘കിങ് സോളമൻ’, ‘ഫാന്റം’ എന്നീ ചിത്രങ്ങൾക്ക് സംഗീതമൊരുക്കിയതും അദ്ദേഹമാണ്. ഹിന്ദി ചിത്രമായ ‘ചാച്ചി 420’-യുടെ പശ്ചാത്തലസംഗീതവും ദേവ നിർവ്വഹിച്ചിട്ടുണ്ട്. തമിഴ്നാട് സർക്കാരിന്റെ പരമോന്നത ബഹുമതിയായ കലൈമാമണി അവാർഡും ‘ആസൈ’ എന്ന ചിത്രത്തിലൂടെ മികച്ച സംഗീത സംവിധായകനുള്ള സംസ്ഥാന അവാർഡും അദ്ദേഹത്തിന് ലഭിച്ചിട്ടുണ്ട്.
പ്രശസ്ത സംഗീത സംവിധായകൻ ശ്രീകാന്ത് ദേവ, സബേഷ്, മുരളി എന്നിവരാണ് മക്കൾ.
