വയനാട്: മാനന്തവാടിയില് ആദിവാസി യുവാവിനെ കാറില് കെട്ടിവലിച്ച കേസില് രണ്ടുപേര് പിടിയില്. കണിയാമ്പറ്റ സ്വദേശികളായ ഹര്ഷിദ് , അഭിരാം എന്നിവരാണ് പിടിയിലായത് . അഞ്ച് പേരാണ് കേസിലെ പ്രതികള്. ഇവര്ക്കെതിരെ വധശ്രമത്തിന് കേസെടുത്തിരുന്നു.
കഴിഞ്ഞ ദിവസം ചെക്ക് ഡാം കാണാനെത്തിയ വിനോദ സഞ്ചാരികള് സംഘര്ഷത്തിലേര്പ്പെട്ടത് തടയാന് ചെന്ന പയ്യംമ്പള്ളി സ്വദേശി മാതനാണ് ക്രൂരമായ ആക്രമണത്തിനിരയായത്. പ്രതികള്ക്കെതിരെ കര്ശന നടപടി സ്വീകരിക്കാന് മുഖ്യമന്ത്രിയും പൊലീസിന് നിര്ദേശം നല്കി. പ്രതികള് സഞ്ചരിച്ച കാര് കഴിഞ്ഞ ദിവസം പൊലീസ് കസ്റ്റഡിയില് എടുത്തിരുന്നു.
ഞായറാഴ്ച വൈകുന്നേരം ആറ് മണിയോടെയായിരുന്നു നാടിനെ നടുക്കിയ ക്രൂരത. കാറിന്റെ ഡോറിനോട് കൈ ചേര്ത്ത് പിടിച്ച് യുവാവിനെ മാനന്തവാടി- പുല്പ്പള്ളി റോഡിലൂടെ അര കിലോമീറ്ററോളം ദൂരം വലിച്ചിഴച്ചു. കഴിഞ്ഞ ദിവസം പ്രതികള്ക്കെതിരെ വധശ്രമത്തിന് കേസടുത്ത് മാനന്തവാടി പൊലീസ്, അഞ്ചു പ്രതികളെയും തിരിച്ചറിഞ്ഞു. കണിയാമ്പറ്റ സ്വദേശി അര്ഷദ്, കണിയാമ്പറ്റ പച്ചിലക്കാട് സ്വദേശികളായ മുഹമ്മദ് അര്ഷിദ്, അഭിരാം, പനമരം സ്വദേശികളായ വിഷ്ണു, നബീല് കമര് എന്നിവരാണ് പ്രതികള്.
ആക്രമികള് സഞ്ചരിച്ച KL 52 H 8733 എന്ന കാര് കഴിഞ്ഞ ദിവസം പൊലീസ് കസ്റ്റഡിയിലെടുത്തിരുന്നു.
