2008ലെ അഹമ്മദാബാദ് ബോംബ് സ്ഫോടന കേസില് 38 പേര്ക്ക് വധശിക്ഷ. കേസില് കുറ്റക്കാരെന്നു കണ്ടെത്തിയ ബാക്കിയുള്ള 11 പേര്ക്കു പ്രത്യേക കോടതി ജീവപര്യന്തം തടവു ശിക്ഷ വിധിച്ചു. 28 പേരെ വെറുതെവിട്ടു. ഇന്ത്യന് മുജാഹിദ്ദീന് പ്രവര്ത്തകരാണ് സ്ഫോടനം ആസൂത്രണം ചെയ്തത് എന്നായിരുന്നു പ്രോസിക്യൂഷന് കേസ്. 2008 ജൂലായ് 26-നാണ് അഹമ്മദാബാദ് നഗരത്തിലെ വിവിധ ഇടങ്ങളില് ബോംബ് സ്ഫോടനങ്ങളുണ്ടായത്. 70 മിനിറ്റുകള്ക്കിടെ നഗരത്തിലെ 21 ഇടങ്ങളിലുണ്ടായ സ്ഫോടനങ്ങളില് 56 പേര് കൊല്ലപ്പെട്ടു.200 പേര്ക്ക് പരിക്കേറ്റു. സ്ഫോടനത്തിന് പിന്നില് തീവ്രവാദ സംഘടനയായ ഇന്ത്യന് മുജാഹിദ്ദീനാണെന്ന് പോലീസ് കണ്ടെത്തിയിരുന്നു.പതിമൂന്നു വര്ഷം നീണ്ട വിചാരണയ്ക്കൊടുവിലാണ് അഹമ്മദാബാദ് സ്ഫോടന പരമ്പര കേസില് വിധി വന്നത്. മൊത്തം 77 പേരായിരുന്നു പ്രതികള്. ഇതില് 49 പേരാണ് കുറ്റക്കാരാണെന്ന് കോടതി കണ്ടെത്തിയത്. കഴിഞ്ഞ സെപ്റ്റംബറില് കേസിന്റെ വിചാരണ പൂര്ത്തിയായിരുന്നു.
