വീണ്ടും മമ്മൂട്ടിയുടെ ഇഷ്ട്ട നമ്പർ: 369 സ്വന്തമാക്കിയത് ത്രികോണ മത്സരത്തിലൂടെ

പുതിയ ബെൻസ് കാറിനും തന്റെ ഇഷ്ടനമ്പർ സ്വന്തമാക്കി നടൻ മമ്മൂട്ടി. കെ.എൽ. 07 ഡി.സി. 369 എന്ന നമ്പറാണ് പുതിയ മോഡൽ ബെൻസിന് നടൻ സ്വന്തമാക്കിയത്. തിങ്കളാഴ്ച എറണാകുളം ആർ.ടി. ഓഫീസിൽ നടന്ന നമ്പർ ലേലത്തിലൂടെയാണ് 369 നമ്പർ താരം സ്വന്തമാക്കിയത്. കഴിഞ്ഞ ദിവസം കെ.എൽ. 07 ഡി.സി. 369 നമ്പർ മമ്മൂട്ടി കമ്പനി ബുക്ക് ചെയ്തിരുന്നു. അതേ സമയം ഈ നമ്പറിനായി മറ്റ് രണ്ടുപേർ കൂടി രംഗത്തെത്തി. അതിനാൽ ലേലം സംഘടിപ്പിച്ചു. ഓൺലൈനായി നടന്ന ലേലത്തിലൂടെ 1.31 ലക്ഷം രൂപയ്ക്ക് മെ​ഗാസ്റ്റാർ തന്റെ ഇഷ്ട്ട നമ്പർ സ്വന്തമാക്കുകയായിരുന്നു. 5,000 രൂപയായിരുന്നു 369 എന്ന നമ്പറിന് അടിസ്ഥാന വിലയിട്ടിരുന്നത്. എന്നാൽ മമ്മൂട്ടി നമ്പർ കൈവിടില്ലെന്ന് ഉറപ്പായതോടെ നമ്പർ ബ്രാൻഡ് നമ്പറായി. ഈ നമ്പറിന് മമ്മൂട്ടിയുടെ പേരു വന്നതോടെ ആവശ്യക്കാരും കൂടി.മമ്മൂട്ടിയുടെയും മകൻ ദുൽഖർ സൽമാന്റെയും ഗ്യാരേജിലെ പല വാഹനങ്ങൾക്കും 369 എന്ന നമ്പറാണ് അവർ സ്വന്തമാക്കിയിട്ടുള്ളത്.