സംസ്ഥാനത്തെ തിയേറ്ററുകൾ തുറന്നാലും മോഹന്ലാല് ചിത്രമായ ‘മരയ്ക്കാർ അറബിക്കടലിന്റെ സിംഹം’ ഉടന് റിലീസ് ചെയ്യില്ലെന്ന് വിവരം. തിയേറ്ററുകള് തുറന്നാലും എല്ലാ സീറ്റുകളിലും ആളുകളെ ഇരുത്തി പ്രദര്ശനം ഉണ്ടാവില്ല. ഇത് പ്രതീക്ഷിച്ച ലാഭം ഉണ്ടാക്കില്ല. സ്ഥിതിഗതികള് അനുകൂലമായതിന് ശേഷം മാത്രം ചിത്രം പ്രദര്ശനത്തിന് എത്തിയ്ക്കാനാണ് തീരുമാനം.
പാന് ഇന്ത്യന് റിലീസ് ആയതിനാല് മറ്റ് സംസ്ഥാനങ്ങളിലെ സാഹചര്യങ്ങളും പരിശോധിക്കേണ്ടതുണ്ട്.മലയാളത്തിലെ ഏറ്റവും ചിലവേറിയ ചിത്രമാണ് മരക്കാര്. സിനിമ ഒടിടി വഴി റിലീസ് ചെയ്യില്ലെന്ന് സംവിധായകന് പ്രിയദര്ശനും, മോഹന്ലാലും നേരത്തെ വ്യക്തമാക്കിയിരുന്നു. ചുരുങ്ങിയത് 600 സ്ക്രീനുകളില് 21 ദിവസമെങ്കിലും ഓടേണ്ട സിനിമയാണിതെന്നായിരുന്നു മോഹന്ലാല് പറഞ്ഞത്.
മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നട എന്നീ ഭാഷകളിലും മരക്കാര് പുറത്തിറങ്ങും. 100 കോടിയാണ് മരക്കാറിന്റെ ബജറ്റ്. ആന്റണി പെരുമ്പാവൂര്, സന്തോഷ് ടി കുരുവിള, റോയ് സി.ജെ എന്നിവര് ചേര്ന്നാണ് നിര്മ്മാണം. അനി ഐ വി ശശിയും പ്രിയദര്ശനുമാണ് ചിത്രത്തിന്റെ തിരക്കഥ നിര്വ്വഹിച്ചിരിക്കുന്നത്. മഞ്ജു വാര്യര്, സുനില് ഷെട്ടി, പ്രഭു, കീര്ത്തി സുരേഷ് തുടങ്ങിയവരാണ് ചിത്രത്തിലെ പ്രധാന കഥാപാത്രങ്ങള്.
