കോഴിക്കോട്: കുന്ദമംഗലം പൊയ്യയില് കൊട്ടാരം വയലില് വീണ്ടും കക്കൂസ് മാലിന്യം തള്ളി. ഇന്നലെ രാത്രിയാണ് സാമൂഹ്യവിരുദ്ധര് വീണ്ടും കക്കൂസ് മാലിന്യം തള്ളിയത്. പ്രദേശത്ത് രൂക്ഷഗന്ധം അനുഭവപ്പെട്ടതിനെത്തുടര്ന്ന് നടത്തിയ പരിശോധനയിലാണ് വയലില് കക്കൂസ് മാലിന്യം കണ്ടെത്തിയത്. തോട്ടിലെ വെള്ളത്തിന് നിറവ്യത്യാസമുണ്ട്. ജനങ്ങള് ആകെ പൊറുതിമുട്ടിയിരിക്കുകയാണ്. പ്രദേശത്ത് അംഗനവാടിയും ഡ്രൈവിംഗ് ടെസ്റ്റ് നടത്തുന്ന സ്ഥലവും
സ്കൂള് കുട്ടികള് യാത്ര ചെയ്യുന്ന സ്ഥലവും കൂടിയാണ്.
മൂന്നാംതവണയാണ് പൊയ്യയില് കക്കൂസ് മാലിന്യം തള്ളുന്നത്. പ്രദേശത്ത് കക്കൂസ് മാലിന്യം വന്തോതില് തള്ളുന്നതിനെതിരെ പഞ്ചായത്തിലും പോലീസ് സ്റ്റേഷനിലും പരാതി നല്കിയിട്ടും ഒരു മാറ്റവുമില്ല. പഞ്ചായത്ത് സെക്രട്ടറി, സ്റ്റാന്റിംഗ്
കമ്മിറ്റി ചെയര്മാന്, ആരോഗ്യ സ്റ്റാന്റിംഗ് കമ്മിറ്റി ചെയര്മാന് ചന്ദ്രന് തിരുവലത്തും ഹെല്ത്ത് ഇന്സ്പെക്ടറും പ്രദേശം സന്ദര്ശിച്ചു. പ്രദേശത്തെ സിസിടിവി പരിശോധിച്ചാല് സാമൂഹ്യവിരുദ്ധരെ കണ്ടത്താന് കഴിയും എന്നാല് അധികൃതര് നടപടി എടുക്കുന്നില്ല.
